भिरा देशात सर्वांत उष्ण; पारा ४०.५ अंशांवर

पुणे : राज्यातील उन्हाचा ताप वाढल्याने तापमानाचा पारा वर चढू लागला आहे. उच्चांकी ४०.५ अंश सेल्सिअस तापमानाची नोंद झाल्याने कोकणातील भिरा हे देशाातील सर्वांत उष्ण ठिकाण ठरले आहे. मध्य महाराष्ट्र, मराठवाडा, विदर्भात अनेक ठिकाणी तापमान ३५ अंशांच्या पुढे गेले आहे.  मध्य महाराष्ट्र आणि दक्षिण कोकण परिसरावर समुद्र सपाटीपासून ९०० मीटर उंचीवर चक्राकार वाऱ्याची स्थिती अाहे. त्यापासून लक्षद्वीप बेटांपर्यंत हवेचा कमी दाबाचा पट्टा सक्रिय असल्याने राज्यात ढगाळ हवामान होत आहे. कोकणासह मध्य महाराष्ट्र व मराठवाड्यात काही ठिकाणी दिवसाच्या कमाल तापमानात वाढ झाली आहे. भिरा येथे दिवसाच्या तापमानात सरासरीपेक्षा ३.४ अंशांची वाढ झाली आहे. रविवारी राज्यात अंशत: ढगाळ हवामानाचा अंदाज वर्तविण्यात आला आहे. शनिवारी (दि. १०) सकाळी साडेआठ वाजेपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे ३५.३, नगर ३८.४, जळगाव ३५.४, कोल्हापूर ३६.१, महाबळेश्वर ३१.१, मालेगाव ३६.०, नाशिक ३५.२, सांगली ३६.६, सातारा ३६.० सोलापूर ३८.६, मुंबई ३१.०, अलिबाग ३१.२, रत्नागिरी ३२.८, डहाणू ३०.९, भिरा ४०.५, औरंगाबाद ३६.०, परभणी ३८.४, नांदेड ३७.०, बीड ३७.८, अकोला ३८.६, अमरावती ३५.४, बुलडाणा ३४.४, ब्रह्मपुरी ३६.२, गोंदिया ३३.०, नागपूर ३२.३, वाशिम ३७.८, वर्धा ३४.०, यवतमाळ ३५.५.  बंगालच्या उपसागरात कमी दाब क्षेत्र नैऋत्य बंगालच्या उपसागरात तमिळनाडू आणि श्रीलंकेच्या किनाऱ्यालगत कमी दाबाचे क्षेत्र तयार झाले होते. रविवारी सकाळपर्यंत या कमी दाब क्षेत्राची तीव्रता वाढण्याची शक्यता वर्तविण्यात आली आहे. जोरदार वारे, मेधगर्जनेसह पाऊस पडण्याची शक्यता आहे. समुद्र किनाऱ्यालगत जोरदार वारे वाहणार असल्याने मासेमारीसाठी समुद्रात न जाण्याचा इशारा देण्यात आला आहे.