भिरातील तापमानाचे रेकॉर्ड यंदा मोडणार?

पुणे : राज्यामध्ये एप्रिल महिन्यात आतापर्यंतच्या इतिहासात सर्वकालीन उष्ण ठिकाणांमध्ये कोकणातील भिरा सर्वांत उष्ण ठरले आहे. २७ एप्रिल २००५ रोजी भिरा येथे उच्चांकी ४९ अंश सेल्सिअस तापमानाची नोंद झाली होती; तर नगर येथे १० एप्रिल २०१० रोजी दुसऱ्या क्रमांकाचे उच्चांकी ४८.२ अंश सेल्सिअस, तसेच ३० एप्रिल २००९ रोजी नागपूर येथे तिसरे सर्वकालीन उच्चांकी ४७.१ अंश सेल्सिअस तापमानाची नोंद झाल्याचे हवामान विभागाकडील नोंदींवरून स्पष्ट होत आहे.  सध्या भिरा येथील केंद्रातून नोंदी घेणे बंद असून, या ठिकाणी केंद्राचे काम सुरू आहे. उन्हाचा चटका चांगलाच वाढला असून, यंदा एप्रिल महिन्यातील तापमानाचे आतापर्यंतचे उच्चांक मोडीत निघाले आहेत. शनिवारी (ता. २८) विदर्भातील बुलडाणा ४३.३, चंद्रपूर ४६.५, मराठवाड्यातील परभणी ४५.७ येथे आतापर्यंतच्या सर्वकालीन उच्चांकी तापमानाची नोंद झाली.  यापूर्वी बुलडाणा येथे ३० एप्रिल २००९ रोजी उच्चांकी ४३.२ अंश सेल्सिअस, चंद्रपूरमध्ये २००९ मध्ये २२ एप्रिल रोजी ४६.४ अंश सेल्सिअस, तर परभणी येथे २०१६ मध्ये २१ व २२ एप्रिल रोजी ४५.१ सेल्सिअस तापमान नोंदले गेले होते. सध्या अकोला (४६.७) सर्वांत उष्ण ठरत असले तरी, तेथे ३० एप्रिल २००९ मध्ये आतापर्यंतच्या उच्चांकी ४७ अंश सेल्सिअस तापमानाची नोंद झाली आहे.  राज्यातील विविध ठिकाणचे एप्रिल महिन्यातील आतापर्यंतचे सर्वकालीन उच्चांकी तापमान (अंश सेल्सिअस), कंसात तारीख, वर्ष : पुणे ४३.३ (३०,१८९७), नगर ४८.२ (१०, २०१०), जळगाव ४७.२ (२६,१९७०), कोल्हापूर ४१.७ (२९,१९५६), महाबळेश्वर ३७.६ (२१,१९७६), मालेगाव ४५.६ (३०.२००९), नाशिक ४२.२ (२४.१९५८), सांगली ४३.० (१४,१९७३), सातारा ४२.४ (३०,२०१३), सोलापूर ४४.९(२२,२०१६), अलिबाग ४०.० (१९,१९५५), भिरा ४९ (२७, २००५),डहाणू ४०.६ (१९,१९५५), सांताक्रूझ ४२.२ (१४,१९५२), रत्नागिरी ३७.५ (७,१९८९), औरंगाबाद ४३.६ (२६,१९५८), बीड ४४.६ (१५,१९८१), परभणी ४५.७ (२७,२०१९), उस्मानाबाद ४३.८ (२२,२०१६), नांदेड ४६.० (७,२००५), अकोला ४७.० (३०,२००९), अमरावती ४६.१ (३०,१९५८), बुलडाणा ४३.३ (२८,२०१९), बह्मपुरी ४६.५ (२३,१९८१), चंद्रपूर ४६.५ (२८,२०१९), गोंदिया ४६.१ (३०,२००७), नागपूर ४७.१ (३०,२००९), वर्धा ४६.४ (३०,१९९६), यवतमाळ ४५.५(१४,१९७३).