शिरपूर तालुक्यात आठ बंधाऱ्यांच्या कामांचे भूमीपूजन

शिरपूर, जि. धुळे : तालुक्यातील बोरगाव, जातोडा आणि वनावल परिसरातून जाणाऱ्या नाल्यावर शिरपूर पॅटर्नअंतर्गत बांधण्यात येणाऱ्या आठ बंधाऱ्यांच्या कामांचे भूमिपूजन आमदार काशिराम पावरा यांच्या हस्ते नुकतेच करण्यात आले. 

जातोडा-चांदपुरी रस्त्यावर झालेल्या या कार्यक्रमात जिल्हा परिषदेचे अध्यक्ष डॉ. तुषार रंधे, माजी नगराध्यक्ष प्रभाकर चव्हाण, माजी नगरसेवक अशोक कलाल, वनावल गटाच्या जिल्‍हा परिषद सदस्या अभिलाषा पाटील, शिसाका संचालक भरत पाटील, पंचायत समितीचे माजी उपसभापती जगतसिंह राजपूत, बाळदे येथील विठ्ठलधाम ट्रस्टचे सचिव निंबा पाटील, पंचायत समिती सदस्य ममता चौधरी, बाजार समितीचे सभापती नरेंद्रसिंह सिसोदिया, भाजपचे जिल्हा उपाध्यक्ष के. डी. पाटील उपस्थित होते.  

डॉ. रंधे म्हणाले, ‘शेतीसाठी सिंचनाची भरीव सोय व्हावी, या हेतूने बंधाऱ्यांचे काम सुरु आहे. त्यासाठी शेतकऱ्यांनी सहकार्य करायला हवे. बंधाऱ्यांसाठी शेतालगतची थोडीफार जागा द्यावी लागली तर मागेपुढे पाहू नये.’’ 

जातोड्याचे सरपंच रावसाहेब धनगर, उपसरपंच दर्यावसिंह राजपूत, बोरगावचे उपसरपंच योगेंद्रसिंग सिसोदिया, वनावलचे माजी सरपंच मनोहर पाटील, उप्परपिंड सरपंच योगेश पाटील, खर्दे पाथर्डेचे सरपंच सतीश पाटील आदी उपस्थित होते. आर. सी. सिसोदिया यांनी सूत्रसंचालन केले. 

बंधाऱ्यांची मालिका 

वाघाडी (ता. शिरपूर) पासून बोरगाव, जातोडा, वनावल परिसरातून वाहत जाणारा नाला वनावल येथे तापी नदीला जाऊन मिळतो. वाघाडी परिसरात यापूर्वीच नाल्यावर चार बंधारे बांधले आहेत. जातोडा आणि वनावल परिसरात एकूण आठ बंधारे साकारले जातील. त्यामुळे या परिसरातील शेती सिंचनाखाली येण्यास मदत होईल.