खानदेशात ‘बंद’ला जोरदार प्रतिसाद

खानदेशात ‘बंद’ला जोरदार प्रतिसाद
खानदेशात ‘बंद’ला जोरदार प्रतिसाद

जळगाव : आरक्षणाच्या मागणीसाठी गुरुवारी (ता. ९) पुकारलेल्या सकल मराठा समाजाच्या बंदला खानदेशात जोरदार प्रतिसाद मिळाला. कुठेही हिंसक घटना घडल्या नाहीत. सर्वच प्रमुख शहरांत कडकडीत बंद पाळण्यात आला. प्रमुख बाजारपेठा, महाविद्यालये, बाजार समित्या बंद ठेवण्यात आल्या. केळी वाहतुकीवर परिणाम झाला. वाहतूकदारांनीही बंद पाळला. यामुळे कोट्यवधींचे व्यवहार थांबले.

नंदुरबार जिल्ह्यात मराठा मोर्चाकडून बंद मागे घेतल्याची घोषणा बुधवारीच (ता. ८) करण्यात आली होती. यामुळे सर्व व्यवहार सुरळीत झाले. धुळे व जळगाव येथे बाजार समितीमधील भाजीपाला मार्केट यार्डात मात्र लिलाव सुरळीत झाले. आंदोलकांनी बंदचे आवाहन केले. जळगाव शहरात नवी पेठेनजीकच्या सर्व बाजारपेठा बंद होत्या. धुळ्यात देवपूर, महामार्ग भागात बंदला चांगला प्रतिसाद मिळाला. 

धुळे व जळगाव बाजार समित्यांमध्येही बंदची स्थिती होती. अनेक व्यापाऱ्यांनी डाळींची पाठवणूक, खरेदी बंद ठेवली. भाजीबाजारात लिलाव झाले, पण आवक कमी होती. चाळीसगाव, रावेर, पाचोरा-भडगाव, धुळे जिल्ह्यातील शिरपूर येथेही बाजार समित्यांमध्ये बंदची स्थिती होती.

मालवाहतूकदारांनीही बंद पाळला. त्यांची सुमारे साडेचार कोटींची उलाढाल थांबली. नंदुरबारात जागतिक भूमिपुत्र दिनाची शासकीय सुटी जिल्हाधिकारी यांनी जाहीर केली होती. तेथील शासकीय कार्यालये, जिल्हा परिषद व खासगी संस्थांच्या शाळा, महाविद्यालयांना सुटी होती.

केळी पाठवणुकीवर परिणाम केळीची वाहतूकही बंदने अडचणीत आली. अनेक मालवाहतूकदारांनी वाहने दिली नाहीत. काही व्यापाऱ्यांनी आपल्या जोखमीवर मालवाहू वाहने मध्य प्रदेशातून आणून वाहतूक करून घेतली. परंतु अनेक स्थानिक केळी व्यापाऱ्यांनी खरेदी बंद ठेवली. यामुळे यावल, रावेर व चोपड्यातून फक्त १६० ट्रक (एक ट्रक १५ मेट्रिक टन क्षमता) केळीची वाहतूक झाली. सुमारे १०० ट्रक केळीची कापणी व वाहतूक रखडल्याचे सांगण्यात आले.

बऱ्हाणपूर (मध्य प्रदेश) येथील बाजारावरही आंदोलनाचा परिणाम झाला. तेथेही केळीची आवक नेहमीपेक्षा कमी झाली. सुमारे १२० ट्रक केळीची कमी आवक झाली. केळी वाहतूक बंद राहिल्याने जवळपास सात ते आठ कोटींचा फटका रावेर, यावल, चोपडा, जळगाव, मध्य प्रदेशातील वाणिज्य आस्थापने व इतर संबंधित संस्थांना बसल्याचे सांगण्यात आले.

गुरुवारी (ता. ९)  सकाळपासून धुळे व जळगाव एसटी बस आगारातून मराठवाडा भागातील एसटी बस वाहतूक बंद ठेवण्यात आली.

जळगाव शहरातील दाणा बाजारातही बंदमुळे व्यवहार ठप्प होते. आत्यावश्यक सेवा सुरू होती. फूल मार्केटही बंद होते. जळगावातील वल्लभदास वालजी (गोलाणी) व्यापारी संकुलात बंदचे आवाहन करण्यासाठी आलेल्या काही व्यक्तींनी आरडाओरड केली. यामुळे पळापळ झाली. आंदोलकांनी आरक्षणासाठी जोरदार घोषणाबाजी केली.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com