सांगली जिल्ह्यात भाजपच्या वारुला ब्रेक

सांगली ः लोकसभा, विधानसभा, जिल्हा परिषद, पंचायत समिती, नगरपालिकांमध्ये भाजपच्या चौखेर उधलेल्या वारुला ग्रामपंचायत निवडणुकीत ब्रेक लागला आहे. कॉंग्रेस, राष्ट्रवादीचा घसरता आलेख या निवडणुकीत सावरला आहे. जिल्ह्यातील सव्वाचारशेपैकी सुमारे साठ टक्‍क्‍यांहून अधिक ग्रामपंचायतीत कॉंग्रेस, राष्ट्रवादीने बाजी मारली आहे, मात्र या निवडणुकीच्या निमित्ताने प्रथमच भाजपचे वारे गल्लीबोळात शिरले आणि त्याचा प्रभावही दिसला. जिल्ह्यातील ४५३ ग्रामपंचायतींसाठी निवडणूक लागली होती. पैकी २८ ग्रामपंचायती बिनविरोध झाल्या होत्या. प्रत्येक तालुक्‍यात संमिश्र गट तयार झाले होते. यामुळे आपला उमेदावर कसा निवडणूक येईल सर्वांनी याची तयारी केली होती. माजी मंत्री पतंगराव कदम यांच्या पलूस व कडेगाव तालुक्‍यात कॉंग्रेसने चांगली कामगिरी करत भाजपला रोखले. तेथे भाजपचे जिल्हाध्यक्ष पृथ्वीराज देशमुख गटाची ताकद कमी पडल्याचे दिसले. वाळवा तालुक्‍यात स्वाभिमानी शेतकरी संघटनेत फूट पडल्याने माजी मंत्री जयंत पाटील यांच्या नेतृत्वाखाली राष्ट्रवादीने दमदार कामगिरी केली. कृषी राज्यमंत्री सदाभाऊ खोत यांच्या नेतृत्वाखालील पॅनेलला ६ ग्रामपंचायती मिळाल्या. शिराळ्यात राष्ट्रवादीने झेंडा रोवला आहे. त्यामुळे शिराळा तालुक्‍यात राष्ट्रवादीचा गड पुन्हा एकदा उभा राहिला. जत तालुक्‍यात विद्यमान आमदार विलासराव जगताप यांच्या समर्थकांवर कॉंग्रेसने कुरघोडी करत ३३ ग्रामपंचायतींत सत्ता मिळवली. भाजपला १६ तर राष्ट्रवादीला २ ग्रामपंचायतींत यश मिळाल्याचे आकडे आहेत. खानापूर तालुक्‍यात शिवसेनेचा गावा गावात प्रभाव दिसून आला. आमदार अनिल बाबर यांच्या मुळे खानापूर तालुक्‍यात भगवे वादळ तयार केले. मिरज तालुक्‍यात भाजपने चांगली कामगिरी केली आहे. तेथे भाजप तीन गटांत विखुरला असला तरी कॉंग्रेसला फारसे यश आलेले नाही. तासगाव तालुक्‍यात खासदार संजय पाटील समर्थक भाजपने चांगली कामगिरी करत दिवंगत आर. आर. पाटील गटाला तगडी लढत दिली आहे. तासगाव तालुक्‍यात राष्ट्रवादीला आत्मपरीक्षण करण्याची वेळ आली आहे.