भाजपतर्फे एक नोव्हेंबरला काळ्या फिती लावून निषेध

परभणी : मराठवाडा, विदर्भातील अतिवृष्टिग्रस्त शेतकऱ्यांना मदत करण्याची राज्य सरकारची दानत नाही. हे सरकार शेतकऱ्यांच्या बाबतीत अत्यंत असंवेदनशील आहे. मदतीविना शेतकऱ्यांना काळी दिवाळी साजरी करावी लागणार. ही बाब अत्यंत चिंताजनक आहे. त्यामुळे भाजप कार्यकर्ते १ नोव्हेंबर रोजी काळ्या फिती लावून राज्य सरकारचा निषेध करणार आहेत, असे भारतीय जनता पक्षाचे प्रदेशाध्यक्ष चंद्रकांत पाटील यांनी गुरुवारी (ता. २१) येथे पत्रकार परिषदेत सांगितले.

अतिवृष्टीमुळे मराठवाडा तसेच विदर्भातील संपूर्ण पिके नष्ट झाली. जमिनी खरडून गेल्या. सोयाबीनचे ८२ टक्क्यांहून अधिक नुकसान झाले आहे. या परिस्थितीत खरे तर पंचनामे करायचे गरज नाही. दोन वादळांमुळे शेतकऱ्यांचे नुकसान झाले आहे. नैसर्गिक संकटामुळे शेतकरी मोठ्या आर्थिक अडचणीत सापडले आहेत. परंतु दिवाळी तोंडावर आली तरी अद्याप सरकार शेतकऱ्यांना मदत द्यायला तयार नाही. त्यामुळे शेतकऱ्यांना काळी दिवाळी साजरी करावी लागणार आहे. भारतीय जनता पक्षाचे सरकार असताना शेतकऱ्यांना भरीव मदत केली होती. विमा भरपाईसुद्धा दिली होती. 

वेगवेगळ्या भागात नैसर्गिक संकटांमुळे शेतकरी अडचणीत असताना राज्य सरकारने जाहीर केलेले १० हजार कोटींचे पॅकेज तोकडे आहे. विमा भरपाईची परिस्थिती चिंताजनक आहे. राज्य सरकारने पेट्रोल आणि डिझेलचा जीएसटीमध्ये समावेश केला असता, तर या इंधनाच्या किमती कमी राहिल्या असत्या, असेही पाटील म्हणाले. या वेळी आमदार मेघना बोर्डीकर, आनंद भरोसे, डॉ. सुभाष कदम उपस्थित होते.