किनवटमध्ये किसान सभेचा रास्ता रोको

नांदेड : कामगारांच्या राष्ट्रव्यापी संप तसेच शेतकऱ्यांच्या राष्ट्रव्यापी ‘डेरा डालो, घेरा डालो’ या आंदोलनांतर्गत किनवट येथील उपविभागीय कार्यालयासमोरील रस्त्यावर किसान सभेच्या वतीने शेतकऱ्यांच्या मागण्यांसाठी ‘घेरा डालो’ व ‘रास्ता रोको’ आंदोलन करण्यात आले.

केंद्र सरकारने कामगार कायद्यांमध्ये बदल करीत कामगारांचे अधिकार कमी केले. तर दुसरीकडे कृषी कायदा करून शेतकऱ्यांना भांडवलदारांच्या घशात घालून त्यांना गुलाम करण्याचा प्रयत्न चालविला आहे. सरकारच्या जनविरोधी धोरणाचा विरोध करण्यासाठी देशव्यापी संपात भाग घेत किसान सभेने तहसील कार्यालयासमोर रास्ता रोको केला. 

नुकसानग्रस्त शेतकऱ्यांना एकरी ५० हजार रुपयांची मदत करावी, पीकविमा योजनेची रास्त अंमलबजावणी करून शेतकऱ्यांना फायदेशीर पीक योजना तयार करावी, शेतकऱ्यांच्या सर्व पिकांना आधार भावाने कायदेशीर संरक्षण द्यावे, कर्जमुक्ती योजना राबवावी, शेतकरी विरोधी कायदा रद्द करावा, नवीन वीज बिल मागे घ्यावा, वन जमीन, महसूल जमीन, तसेच देवस्थान इनामी जमीन कसत असणाऱ्यांचा नावे करावी, आदिवासींचे प्रलंबित दावे निकालात काढावे, इतर पारंपरिक वनजमीन करणाऱ्यांना या कायद्यातील तीन पिढ्यांची असलेली अट रद्द करावी, कोरोना लॉकडाउन काळातील जनतेचे व शेतकऱ्यांचे वीज बिल माफ करावे, या मागण्या करण्यात आल्या. 

या आंदोलनात कॉ. किसन गुजर, अर्जुन आडे, शंकर सिडाम, किशोर पवार, प्रल्हाद चव्हाण, खंडेराव कानडे, अनिल आडे, प्रभाकर बोड्डेवार, मधुकर राठोड, जनार्दन काळे, नंदू मोदुकवार, मनोज सल्लावार, स्टॅलिन आडे, अबंर चव्हाण, वसंत कोडमेते, मडावी, शेषराव ढोले, दादाराव टारपे, विजय गाभणे आदिनी सहभाग घेतला.