बनावट संवर्धके, कीटकनाशकांचा २९ लाखांचा साठा परभणीजवळ जप्त

परभणी: विनापरवाना बनावट पीकवाढ संवर्धके (पीजीआर), वनस्पतीजन्य कीटकनाशके तयार करून पॅंकिंवर विविध कंपन्यांचे लेबल लावून विक्री करणाऱ्या ठिकाणावर छापा टाकून स्थानिक गुन्हे शाखा तसेच कृषी विभागाच्या पथकाने केलेल्या कारवाईत २८ लाख ७६ हजार ९१० रुपये किमतीची रसायने, विविध कंपन्यांचे लेबल्स तसचे अन्य साहित्यांचा साठा जप्त करण्यात आला. शनिवारी (ता.२१) या प्रकरणी दोन जणांविरुद्ध नवा मोंढा पोलिस ठाण्यात गुन्हा दाखल करण्यात आला असून, पोलिसांनी दोन आरोपींना अटक केली आहे. परभणी शहरातील खानापूर -पिंगळी रस्त्यावरील बलसा या गावात गेल्या वर्षभरापासून विनापरवाना बनावट पीकवाढ संवर्धके, वनस्पतीजन्य कीटकनाशके तयार करून विक्री केली जात असल्याची माहिती पोलिसांना मिळाली होती. शुक्रवारी (ता. २०) दुपारी चारच्या सुमारास याठिकाणावर स्थानिक गुन्हे शाखेचे पोलिस निरीक्षक प्रवीण मोरे तसेच जिल्हा अधीक्षक कृषी अधिकारी बी. आर. शिंदे यांच्या पथकाने छापा टाकला. छाप्यात राज्यातील विविध ठिकाणच्या कंपन्यांच्या नावाचे लेबल लावलेल्या पीकवाढ संवर्धके तसेच वनस्पतीजन्य कीटकनाशकांचा साठा, रसायने, लेबल्स सह अन्य साहित्य आढळून आले.  शनिवारी (ता. २१) सकाळी पाच वाजेपर्यंत चाललेल्या या कारवाईत कीटनाशके, रसायने, लेबल एकूण २८ लाख ७६ हजार ९१० रुपये किमतीचे साहित्य जप्त करण्यात आले. या प्रकरणी नवा मोंढा पोलिस ठाण्यात फौजदार एस. ए. गोपीनवाड यांनी दिलेल्या फिर्यादीवरुन माधव केंद्रे (रा. वाघदरवाडी, ता. लोहा, जि. नांदेड) आणि गीता सुर्यवंशी (रा. भाग्यनगर, परभणी) यांच्याविरुद्ध गुन्हा दाखल करण्यात आला आहे. दोन्ही आरोपींना अटक करण्यात आली असल्याचे पोलिस सूत्रांनी सांगितले. पीकवाढ संवर्धके तसेच कीटकनाशकांचे नमुने काढण्यात आले असून प्रयोगशाळेकडे तपासणीसाठी पाठविण्यात आले आहेत, असे उपविभागीय अधिकारी सागर खटकाळे यांनी सांगितले.