`विकेल ते पिकेल’ संकल्पनेत भरिताची वांगी, दादर ज्वारीही 

जळगाव ः ‘विकेल ते पिकेल’ संकल्पनेत जिल्ह्यात भरिताची वांगी व दादर ज्वारीचा समावेश झाला आहे. यामुळे भरिताची वांगी व ज्वारीच्या पणन, प्रक्रिया कार्यवाहीत सुधारणा, गती देण्याचा प्रयत्न केला जाणार आहे. 

या अंतर्गत जळगाव शहरात ग्राहकांना पोच किंवा थेट भरिताची वांगी विक्रीचा उपक्रम राबविला जाणार आहे. आसोदा, नशिराबाद भागातील वांगी उत्पादकांचा यात समावेश केला जाण्याची शक्यता आहे. तसेच भरिताच्या वांग्याची विक्री करण्यासाठी जळगाव शहरात ठिकठिकाणी स्टॉल लावण्यात येणार आहेत. यासाठी प्रशासन व पालिकेची मदत घेतली जाईल. भरिताच्या वांग्याचा हंगाम ऑक्टोबरमध्ये सुरू होतो. तो जानेवारीपर्यंत जोमात सुरू असतो. जळगाव शहरात भरीत-भाकरी विक्रेत्यांनाही वांग्यांची गरज असते. यातही थेट विक्रीचा उपक्रम राबविण्याचा प्रयत्न केला जाणार आहे. 

वांग्यांची पुणे, मुंबईत पाठवणूक करण्यासाठी अनुदान मिळेल का, यावरही काम केले जाणार आहे. त्यासाठी शेतकऱ्यांनी प्रशासनाकडे मागणी करण्याची तयारी केली आहे. तसेच वांग्यावर प्रक्रिया करून भरिताची विक्री महानगरांमध्ये करण्यासंबंधीदेखील शासनाचे प्रोत्साहन कसे मिळेल, याबाबत कार्यवाही केली जाईल. 

यासंदर्भात लवकरच वांगी थेट विक्रीचा शुभारंभ केला जाणार आहे. तसेच ज्वारीची थेट विक्री, इतर बाजारांमध्ये पाठवणूक, प्रक्रिया याबाबतही कार्यवाही केली जाणार असल्याचे सांगण्यात आले.