बीटी बियाणे १५ मेपूर्वी विक्रीस मनाई

पुणे : राज्यातील बियाणे उत्पादक कंपन्यांनी १५ मेपूर्वी बीटी बियाण्यांचा कोणत्याही तालुक्यात पुरवठा करू नये, असे आदेश दिले आहेत. बियाण्यांचा पुरवठा लवकर केल्यास बोंडअळीचा धोका उद्भवतो, असा दावा कृषी विभागाचा आहे. राज्यात ४० लाख हेक्टरपेक्षा जास्त क्षेत्रावर कपाशीचे पीक घेतले जाते. त्यातील १०-१५ टक्के लागवड ही अर्लीची असते. मान्सूनपूर्व पाऊस येईल किंवा जूनच्या पहिल्या-दुसऱ्या आठवड्यात पाऊस हमखास येईल, असे मानून काही भागांत शेतकरी धूळपेरणी करतात. मात्र, हे गृहीतक चुकल्यास बोंडअळीचा धोका मोठया प्रमाणात उद्भवतो, असे कृषी विभागाचे म्हणणे आहे.  धूळपेरणी झालेल्या तसेच पावसाचा ताण बसलेल्या भागात बोंडअळीचा प्रादुर्भाव झपाटयाने झाल्याचे २०१७ च्या हंगामात आढळून आले होते. बोंडअळीचा धोका लक्षात घेता शेतकऱ्यांनी यंदा कोणत्याही भागात धूळपेरणी करू नये यासाठी आम्ही बियाण्यांचा पुरवठा नियंत्रित करण्याचा निर्णय घेतला.  गेल्या हंगामात देखील पुरवठा नियंत्रित केल्याने चांगला परिणाम दिसून आला,’’ अशी माहिती सूत्रांनी दिली.  गुलाबी बोंडअळीच्या विरोधात बीटी बियाण्यांमधील जनुकांची असलेली प्रतिकाराची क्षमता कमी झालेली आहे. त्यात पुन्हा पावसाचा ताण बसल्यास बोंडअळीचा प्रसार झपाट्याने होतो. त्यासाठी कंपन्यांकडून वितरकांना १५ मेपर्यंत प्लेसमेंट अर्थात बियाण्यांचा पुरवठा केला जाणार नाही. बियाणे कंपन्यांनी राज्यातील वितरकांना यंदा भरपूर म्हणजेच जवळपास सव्वादोन कोटी बीटी पाकिटांचा पुरवठा करण्याची तयारी दाखविली आहे. वितरकांनी जूनच्या पहिल्या आठवड्यापासून विक्रेत्यांकडे बियाणे पोचविणे अपेक्षित आहे. म्हणजेच शेतकऱ्यांना ३० मेच्या आधी बीटी बियाण्यांचे पाकीट विकत मिळणार नाही, असे सूत्रांनी स्पष्ट केले. बियाणे विक्री  १ जूनपासून ः बियाणे उद्योग बियाणे उद्योगातील कंपन्यांनी कृषी विभागाच्या या मनाई आदेशाला पाठिंबा दिला आहे. “आम्ही ३० मेच्या पूर्वी कोणत्याही भागात बियाण्यांची विक्री न करण्याचा निर्णय घेतला आहे. मात्र, प्रत्येक कंपनी सोयीप्रमाणे मेअखेरपर्यंत संबंधित जिल्ह्यांच्या गोदामाकडे आपला माल पोहोचता करेल. मात्र, हा माल १जूनपासून विक्रेत्यांना उपलब्ध करून देण्याबाबत कंपन्या ठाम आहेत,’’ अशी माहिती बियाणे उद्योग सूत्रांनी दिली.