मोसंबी फळगळीबाबत तज्ज्ञ बांधावर

औरंगाबाद : मराठवाड्यातील मोसंबीच्या संकटात सापडलेल्या आंबे बहाराची वसंतराव नाईक मराठवाडा कृषी विद्यापीठाचे तज्ज्ञ व कृषी विभागाच्या अधिकाऱ्यांनी बुधवारी (ता. २९) पैठण तालुक्‍यात पाहणी केली. या पाहणीत तज्ज्ञांनी फळगळीच्या कारणांचा शोध घेतला असता विविध कारणे पुढे आली. त्यावर उपायही सुचविले गेले. कारणांच्या स्पष्टतेसाठी आणखी काही भागात प्रत्यक्ष बागेत जावून पाहणी केली जाणार आहे. या पाहणीदरम्यान मोसंबी उत्पादक शेतकऱ्यांनी तालुका कृषी अधिकाऱ्यांना शासनाकडून मदत देण्याची मागणी करणारे निवेदन सादर केले.

मराठवाड्यातील मोसंबीचे पीक सर्वात महत्त्वाचे. या फळपिकाच्या आंबे बहारावर यंदा फळगळीचं मोठ संकट ओढवलं आहे. गतवर्षीपर्यंत पाच ते दहा टक्‍क्‍यांपर्यंत असणारी ही फळगळ यंदाच्या आंबे बहारात २० ते ५० टक्‍क्‍यांपर्यंत पोहचली आहे.

‘ॲग्रोवन’ने बुधवारी (ता. २९) मोसंबीच्या आंबे बहाराच्या परिस्थीतीसह शेतकऱ्यांच्या मागणीविषयीचे वृत्त प्राधान्याने प्रकाशीत केले. त्या वृत्ताची दखल घेत संकटात सापडलेल्या मोसंबी उत्पादकांना उपाय सुचविण्यासाठी बुधवारीच मोसंबी संशोधन केंद्राचे प्रमुख डॉ. एम. बी. पाटील, राष्‌ट्रीय कृषी संशोधन केंद्राचे प्रमुख डॉ. एस. बी. पवार, वनस्पती रोग शास्त्रज्ञ डॉ. गजेंद्र जगताप, कृषी विस्तार शिक्षण केंद्राचे रामेश्वर ठोंबरे, तालुका कृषी अधिकारी भाऊसाहेब पायघन, मंडळ कृषी अधिकारी रामनाथ कारले, वसंतराव कातबने, संदीप जवने आदींनी पैठण तालुक्‍यातील मोसंबी उत्पादकांच्या बांधांवर जावून मोसंबीच्या अवस्थेची पाहणी केली.

या पाहणीदरम्यान लोहगाव येथे शेतकरी विजय रेंधे यांच्यासह अनेक शेतकऱ्यांनी फळगळ झालेल्या शेतकऱ्यांनी झालेल्या नुकसानीप्रकरणी शासनाने मदत देण्याची मागणी केली.

फळगळीची तज्ज्ञांच्या निदर्शनास आलेली कारणे संतुलित खत वापराचा अभाव लागवडीचे अंतर शिफारशीनुसार नसणे माती परीक्षणावर भर नसणे पावसाच्या खंडाचाही परिणाम हवामानातील बदलाचा परिणाम गरजेपेक्षा जास्त मोकळे पाणी देणे ठिबकनेही पाणी देण्यासाठी सदोष पद्धतीचा वापर