कृषी राज्यमंत्र्यांकडून बुलडाण्यातील दुष्काळाची पाहणी

बुलडाणा : जिल्ह्यात झालेल्या जेमतेम पावसामुळे संपूर्ण खरीप हंगाम संकटात सापडला आहे. याची पाहणी कृषी राज्यमंत्री सदाभाऊ खोत यांनी केली. दोन दिवसांच्या दौऱ्याची सुरवात त्यांनी शेगाव तालुक्यातील सवर्णा गावापासून केली. त्यानंतर चिंचोली कारफार्मा येथील शेतकरी गोपाळ गिते यांच्या कापूस पिकाची पाहणी केली.

खोत यांनी कपाशीची सुकलेली व अळीग्रस्त बोंडांची पाहणी करून शेतकऱ्यांसोबत चर्चा केली. खामगाव तालुक्यातील जयपूर लांडे येथील शेतकरी विजयसिंग पवार यांच्या कापूस व तूर पिकाची पाहणी केली. शेतकऱ्याकडून त्यांनी काढणीसाठी लागणारा खर्च, मिळणारे उत्पन्न, पीकविमा सहभागाची स्थिती आदी माहिती जाणून घेतली. त्यांनी शेतातील विहिरीच्या पाणीपातळीही पाहिली.

घाटपुरी येथील नामदेव इंगळे यांच्या शेतात तूर पिकाची पाहणी करून खरिपातील पिकांच्या परिस्थितीचा आढावा घेतला. त्यानंतर जळका भडंग येथे नर्मदाबाई सपकाळ यांच्या शेताला, तर निपाणा येथे विश्वनाथ गावंडे यांच्या कापूस पिकला भेट दिली. बोरजवळा येथील कोरडे पडलेले तलाव, तलावातील गाळ काढणे, काढलेला गाळ व निर्मिती आदींविषयी अधिकाऱ्यांकडून माहिती घेतली. त्यानंतर मोताळा तालुक्यातील आडविहीर येथील लक्ष्मण फाटे यांच्या शेतातील कापूस पिकाची पाहणी केली.

दौऱ्याप्रसंगी आमदार ॲड. आकाश फुंडकर, जिल्हा अधीक्षक कृषी अधिकारी नरेंद्र नाईक, उपविभागीय अधिकारी मुकेश चव्हाण, सुनील विंचनकर, तहसीलदार, तालुका कृषी अधिकारी उपस्थित होते.