सोलापुरात बाराशे क्विंटल उडदाची खरेदी

सोलापूर : सोलापूर जिल्ह्यात पाच ठिकाणी हमीभाव केंद्रे सुरू होणार आहेत. तरी प्रत्यक्षात कुर्डूवाडीचेच केंद्र सुरू झाले असून, या केंद्रावर १८५ शेतकऱ्यांच्या १२४१ क्विंटल उडदाची खरेदी झाली आहे. पाच केंद्रांवर ३५७१ शेतकऱ्यांनी आॅनलाइन नोंदणी केली असल्याचे सांगण्यात आले.

यावर्षी खरिपातील सोयाबीन, मूग, उडिदाची हमीभाव केंद्रांवर खरेदी करण्यासाठी शेतकऱ्यांना आॅनलाइन नोंदणी करण्याचे बंधनकारक केले आहे़. सोलापूर जिल्ह्यात कुर्डूवाडी, बार्शी, सोलापूर, दुधनी व अक्कलकोट येथे हमीभाव केंद्रे सुरू करण्यात येणार आहेत. या केंद्रावर उडीद, सोयाबीन व मुगाची आॅनलाइन नोंदणी करण्याचे आवाहन केल्यानंतर कुर्डूवाडी केंद्रावर सर्वाधिक दोन हजार १९ शेतकऱ्यांनी नोंदणी केली.

सोलापूर केंद्रावर १४६, अक्कलकोट १२१, दुधनी ६१ तर बार्शी केंद्रावर १२२४ शेतकऱ्यांनी नोंदणी केली आहे. बार्शी केंद्रावर नोंदणी केलेल्यांमध्ये १५० शेतकऱ्यांनी सोयाबीनची नोंद केली आहे. नोंदणी केलेल्या पैकी केवळ कुर्डूवाडी केंद्रावर १८५ शेतकऱ्यांच्या १२४१ क्विंटलची विक्री झाली आहे. अन्य हमीभाव केंद्रांपैकी बार्शी व दुधनी केंद्र सुरू करण्यात आले असले तरी प्रत्यक्षात धान्याची खरेदी झालेली नाही. दुधनी केंद्रावर धान्य आणण्यासाठी शेतकऱ्यांच्या मोबाईलवर एसएमएस पाठविला असला तरी शेतकऱ्यांचा प्रतिसाद मिळत नसल्याचे सांगण्यात आले.