नगरमध्ये चांगला पाऊस पडेपर्यंत छावण्या सुरू राहणार

नगर : नगर जिल्ह्यामध्ये ४९८ छावण्या सुरू आहेत. चार दिवसांपूर्वी झालेल्या पूर्वमोसमी पावसाने झालेल्या नुकसानीमुळे सहा छावण्यातील जनावरांची संख्या घटली आहे. शासनाने घालून दिलेल्या मर्यादेपेक्षा कमी जनावरे असल्याने प्रशासनाच्या दृष्टीने त्या छावण्या बंद आहेत. दरम्यान चांगला पाऊस पडेपर्यंत किंवा शासनाचे आदेश येईपर्यंत जनावरांच्या छावण्या सुरूच राहणार असल्याचे सांगण्यात आले. 

नगर जिल्ह्यामध्ये यंदा गंभीर दुष्काळाला सामोरे जावे लागले. दुष्काळात जनावरे जगविण्यासाठी शासनाकडून छावण्या सुरू करण्यात आल्या आहेत. यंदा नगर जिल्ह्यात आतापर्यंत सर्वाधिक ५०३ छावण्या सुरू केल्या. 

चार दिवसांपूर्वी नगरमधील काही भागांत पूर्वमोसमी पाऊस झाला. त्यामुळे छावण्यात दाणादाण उडाली, अनेक शेतकऱ्यांनी छावण्यातील जनावरे घरी नेली. त्यामुळे त्या छावण्यात आता सरकारी मर्यादेपेक्षा कमी जनावरे असल्याने त्या छावण्या प्रशासनाच्या दृष्टीने बंद झाल्या आहेत. त्यात जामखेडमधील ३, शेवगावातील २ आणि नगरमधील १ अशा तीन तालुक्‍यांतील चारा छावण्यांचा समावेश आहे. परंतु, पाऊस थांबल्याने शेतकऱ्यांनी बंद पडलेल्या छावण्यांत पुन्हा मर्यादेपेक्षा कमी प्रमाणात जनावरे दाखल करण्यास सुरवात करू लागले. 

जून महिना संपत आला तरी अजूनही पुरेसा पाऊस नाही. सध्या जिल्ह्यामध्ये ४९८ छावण्या सुरू असून आजअखेर ४९८ छावण्यांमध्ये तीन लाख ३० हजार पशुधन दाखल आहेत. अजून पाऊस नसल्याने चारा, पाण्याचा प्रश्‍न गंभीर आहे. त्यामुळे चांगला पाऊस पडेपर्यंत किंवा सरकारचे आदेश येईपर्यंत जनावरांच्या छावण्या सुरूच राहणार असल्याचे प्रशासनाकडून सांगण्यात आले.