‘म्हैसाळ’चा कालवा ओव्हरफ्लो

आरग, सांगली : बेडग (ता. मिरज) येथील म्हैसाळ योजनेच्या मुख्य कालवा पंप हाऊस टप्पा क्रमांक ३ मधील मोटारीत अचानक तांत्रिक बिघाड झाल्याने कालवा ओव्हरफ्लो झाला होता. कालव्याचे पाणी परिसरातील शेतात घुसल्याने शेती पिकांसह बागायतदारांचे मोठे नुकसान झाले आहे. मात्र, याकडे पाटबंधारे विभाग कानाडोळा करताना दिसून येत आहे.

मिरज पूर्व भागातील शेतकऱ्यांनी म्हैसाळ योजनेची पाणीपट्टी भरून सुद्धा लाभ क्षेत्रातील शेवटच्या शेतकऱ्यापर्यंत पाणी मिळत नसल्याची तक्रार शेतकऱ्यांनी केली आहे. यावर्षी योजनेच्या पाणी पट्टीत वाढ करण्यात आली आहे. यंदा २४ तासाला नऊ हजार रुपये इतका जादा दर आकारला जात आहे. जादा पैसे भरूनही पाणी मिळत नसल्याने शेतकऱ्यांत नाराजीचा सूर उमटत आहे.  पाटबंधारे विभागाच्या हलगर्जीपणामुळे कालवा ओव्हरफ्लो होऊन पाण्याची मोठ्या प्रमाणात नासाडी होत आहे. त्याचा सर्वाधिक फटका परिसरातील शेतकऱ्यांना बसत आहे. वाहत्या पाण्यामुळे हातातोंडाशी आलेली पिके वाया गेली आहेत. पिकांत गुडघाभर पाणी उभे राहिले आहे.

आंदोलनाचा इशारा दरवर्षी कालवा ओव्हरफ्लो होतो. शेती पिकांचे नुकसान होते. शेतकऱ्यांनी अनेकदा तक्रार करूनही पाटबंधारे विभागाच्या अधिकाऱ्यांनी दुर्लक्ष केले आहे. पंचनामा करून नुकसानभरपाई द्यावी. अन्यथा तीव्र आंदोलनाचा इशारा नुकसानग्रस्तांनी दिला आहे.

प्रतिक्रिया दरवर्षीच म्हैसाळचा मुख्य कालवा ओव्हरफ्लो होतो. शेतातील माती पाण्याबरोबर वाहून जाते. पिकांचे नुकसान होते. त्याकडे पाटबंधारे विभागाने कायम दुर्लक्ष केले. पंचनामा करून नुकसान भरपाई मिळावी. - अण्णासाहेब पाटील, शेतकरी

प्रतिक्रिया

म्हैसाळ कालवा टप्पा क्र. ३ ओव्हरफ्लो झाला की शेजारील ओढ्यातून कालव्याचे पाणी वाहते. सध्या ५२ मोटारी सुरू आहेत. पंप हाऊसमधील मोटारीत तांत्रिक बिघाड झाल्याने कालवा ओव्हरफ्लो झाला होता. - जयराम वाखार्डे, उपअभियंता, पाटबंधारे विभाग