पंढरपूरची कार्तिकी वारी यंदा नको; जिल्हाधिकारी, पोलिस अधीक्षकांचा प्रस्ताव   

सोलापूर : पंढरपूरची कार्तिकी वारी येत्या २६ नोव्हेंबरला होणार आहे. त्यातच मंदिर खुले करण्याचे आदेश दिले आहेत. दरवर्षीप्रमाणे वारीसाठी होणारी वारकऱ्यांची लाखोंची गर्दी लक्षात घेता कोरोनाचा धोका वाढू शकतो, प्रसंगी आरोग्य यंत्रणा अपुरी पडू शकते. त्यामुळे यंदा प्रतिकात्मक वारी साजरी करावी, किंबहुना वारीच भरवू नये, असा प्रस्ताव जिल्हाधिकारी मिलिंद शंभरकर आणि पोलिस अधीक्षक तेजस्वी सातपुते यांनी मुख्यमंत्री उद्धव ठाकरे यांच्याकडे पाठवला आहे.  

मंदिरे सुरु केल्यानंतर आता भाविकांचा दर्शनासाठी ओघ वाढतो आहे. सध्या पंढरपुरात रोज दोन हजार भाविकांना दर्शनासाठी सोडण्यात येत आहे. परंतु आठ महिन्यांपासून मंदिर बंद असल्याने आणि वारी आता तोंडावर असल्याने भाविकांची गर्दी वाढण्याची शक्यता आहे. या वारीमध्ये ज्येष्ठ मंडळींचा सहभाग अधिक असतो. त्यामुळे गर्दी वाढली तर दर्शनरांग, वाळवंट वा मठात सोशल डिस्टन्सिंगचे पालन कसे आणि किती होईल, याची शंका आहे. 

दोन व्यक्तींमध्ये सहा फुटाचे अंतर ठेवल्यास सध्याची पाचकिलोमीटरची दर्शन रांग २५ किलोमीटरपर्यंत पोचेल. पण पंढरपुरातील दरवर्षीच्या गर्दीचा विचार करता, हे कितपत शक्य आहे. शिवाय ६५ एकर परिसरातही वारकऱ्यांना राहता येणार नाही, असे या प्रस्तावात म्हटले आहे. हा प्रस्ताव आधी विधी व न्याय खात्याकडे पाठवून नंतर तो मुख्यमंत्र्यांकडे पाठवण्यात आला आहे. आता ते काय निर्णय घेतात, याकडे लक्ष आहे. 

‘गावातच प्रतिकात्मक वारी साजरी व्हावी’  कोरोनास्थितीच्या सर्व पार्श्वभूमीवर जिल्हा प्रशासनाने वारीला गर्दी करण्याऐवजी वारकऱ्यांनी टप्प्या-टप्प्याने दर्शनासाठी यावे, स्वतःच्या घरी अथवा गावातच प्रतिकात्मक वारी साजरी करावी, असे आवाहन केले आहे.