पात्र प्रकल्पग्रस्त उमेदवारांना नियुक्तिपत्र देण्यासाठी उपोषण

परभणी ः वसंतराव नाईक मराठवाडा कृषी विद्यापीठांतर्गत प्रकल्पग्रस्तांपैकी ८४ उमेदवारांना नुकतेच नियुक्तिपत्र देण्यात आले आहे. यावर आक्षेप घेण्यात आला असून, प्रकल्पग्रस्तांपैकी पात्र उमेदवारांनाच नियुक्तीचे आदेश देण्यात यावेत, या मागणीसाठी पाच गावांतील प्रकल्पग्रस्तांनी सोमवार (ता. २७)पासून कृषी विद्यापीठांच्या प्रवेशद्वारांवर बेमुदत उपोषण सुरू केले असून, ते मंगळवारी (ता. २८) दुसऱ्या दिवशीही सुरू होते. वसंतराव नाईक मराठवाडा कृषी विद्यापीठांतर्गत बलसा, शेंद्रा, खानापूर, रायपूर, सायाळा येथील प्रकल्पग्रस्त पात्र उमेदवार असून, जाहिरातीनुसार विविध पदांसाठी लेखी परीक्षा व तोंडी परीक्षा दिली होती. त्या वेळी प्रकल्पग्रस्तांच्या रिक्त पदांपैकी १२८ प्रकल्पग्रस्त उमेदवारांची निवड सूची तयार करण्यात आली. यापैकी गेल्या आठवड्यात ८४ उमेदवारांना नियुक्तिपत्र देत नोकरीत सामावून घेतले आहे. परंतु, हे नियुक्तीचे आदेश चुकीच्या पद्धतीने देण्यात आले आहेत. अनेक कुटुंबांतील एकही व्यक्ती यापूर्वी विद्यापीठामध्ये नोकरीस नसताना, उमेदवार पात्र असताना त्यांना डावलण्यात आले आहे. प्रकल्पग्रस्तांवर जाणीवपूर्वक अन्याय करण्यात आला आहे. उर्वरित रिक्त जागांवर प्रकल्पग्रस्त कुटुंबांतील पात्र सदस्यांना नियुक्तीचे आदेश देऊन नोकरीत सामावून घ्यावे. तत्कालीन निवड समितीने नियुक्तीचे आदेश दिलेल्या प्रकरणांची चौकशी करून दोषींवर कारवाई करावी, अशी मागणी विद्यापीठाच्या कुलसचिवांकडे करण्यात आली आहे. या मागणीसाठी पाच गावांतील प्रकल्पग्रस्तांनी विद्यापीठ प्रवेशद्वारावर सोमवार (ता. २७)पासून बेमुदत उपोषण सुरू केले आहे. दरम्यान, प्रकल्पग्रस्तांना घरटी एक या नियमाप्रमाणे वर्ग ३ आणि ४ मधील पदांवर भरती करण्यात यावी. नियमबाह्य भरती, गैरप्रकाराची चौकशी करावी, अशी मागणी लाल बावटा शेतमजूर संघटनेचे अध्यक्ष माजी आमदार विजय गव्हाणे, कार्याध्यक्ष अजय गव्हाणे यांनी केली आहे.  ‘‘२०१३ मध्ये तत्कालीन निवड समितीने १२८ प्रकल्पग्रस्त उमेदवारांची निवड सूची तयार केली होती. त्यानुसार ८४ उमेदवारांना नियुक्तिपत्र देण्यात आले आहेत,’’ असे कुलगुरू डाॅ. बी. व्यंकटेश्वरलू यांनी सांगितले.