गाळप हंगाम नोव्हेंबरमध्ये पूर्ण क्षमतेने सुरू होण्याची चिन्हे

राज्यातील बहुतांशी साखर कारखान्यांचा हंगाम नोव्हेंबरच्या पहिल्या आठवड्यापासूनच सुरू होण्याची चिन्हे आहेत.
Sugar Factory
Sugar Factory

कोल्हापूर : यंदाचा गळीत हंगाम निर्धारित वेळेत म्हणजे १५ ऑक्टोबरला पूर्ण क्षमतेने सुरू होण्याची शक्‍यता कमी आहे. अपवाद वगळता राज्यातील बहुतांशी साखर कारखान्यांचा हंगाम नोव्हेंबरच्या पहिल्या आठवड्यापासूनच सुरू होण्याची चिन्हे आहेत.  गळीत हंगाम सुरू होण्यास केवळ आठवड्याचा कालावधी उरला असला तरी आत्तापर्यंत अनेक कारखान्यांना परवाने मिळाले नाहित. काही कारखान्यांनी एफआरपी पूर्ण दिली नसल्याने कारखान्यांना परवाने मिळताना अडचणी येत आहेत. यातच भर म्हणून यंदा कोविडच्या साथीमुळे कारखान्यांनी लवकर मजूर आणण्याचे टाळले असल्याचे चित्र राज्यातील बहुतांश कारखान्यामध्ये आहे. परिणामी शासनाच्या निर्धारित वेळेत पूर्ण क्षमतेने हंगाम होणे अशक्‍य असल्याचे चित्र आहे. राज्यात यंदा १९० कारखाने गाळप हंगाम सुरू करण्याची शक्‍यता आहे. या पार्श्‍वभूमीवर तांत्रिक पातळीवर कारखान्यांची सज्जता अंतिम टप्प्यात आहे. परंतु तोडणीसाठी महत्त्वाचे असणारे ऊसतोडणी मजूर व यंत्रांची अद्यापही जुळवाजुळव सुरू असल्याचे चित्र कारखाना स्तरावर आहे. यंदा मजूर टंचाईच्या भीतीने ऊसतोडणी यंत्राला कारखान्यांनी प्राधान्य दिले आहे. ही तोडणी यंत्रे मोठ्या क्षेत्रातच चालणार असल्याने जर मजूर कमी आले तर छोटे क्षेत्र असणाऱ्या ऊस उत्पादकांची ऊस तोडणी रखडणार आहे. या पार्श्‍वभूमीवर तोडणीचे नियोजन करण्यात कारखान्यांचे शेती विभाग व्यस्त आहेत. ऊस तोडणी यंत्राने तोडणीची शक्‍यता असणारे क्षेत्र, यंत्राची उपलब्धता, व तोडणी कार्यक्रम याचे वेळापत्रक तयार करण्याचे काम युद्धपातळीवर सुरू आहे.

अंदाज घेऊन मजुरांना बोलावणार हंगाम सुरू होण्यास अगदी दहा दिवसांचा कालावधी उरला असला तरी कोविडच्या पार्श्‍वभूमीवर मजूर आणण्यासाठी कारखाने गडबड करीत नसल्याचे चित्र आहे. अजूनही राज्यात कोविडचे संकट कायम आहे. काही भागात रुग्ण संख्या कमी आढळत आहे. या भागांचा अंदाज घेऊन ऊसतोडणी मजूर आणण्याचे नियोजन सुरू असल्याचे कारखाना प्रतिनिधींनी सांगितले.

प्रतिक्रिया यंदा संभाव्य मजूर टंचाईमुळे ऊसतोडणी कार्यक्रमात काही बदल करणे अपरिहार्य बनले आहे. यंत्राचा वापर वाढविण्याचे नियोजन आहे. यंत्राने व मजुराने तोडणी होणाऱ्या उसाचे क्षेत्र ठरवूनच तोडणी कार्यक्रम आखावा लागत आहे. - दिलीप जाधव, ऊस विकास अधिकारी दत्त सहकारी साखर कारखाना शिरोळ, जि. कोल्हापूर

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com