निकृष्ट बंधाऱ्याप्रकरणी तिघांवर गुन्हे दाखल

बंधारा
बंधारा

गडचिरोली ः चार महिन्यांपूर्वी बांधण्यात आलेले दोन सिमेंट बंधारे पहिल्याच पावसात वाहून गेले. याप्रकरणी वाच्यता झाल्यानंतर चौकशीअंती मृदसंधारण विभागाचे उपविभागीय अभियंत्यांसह तिघांविरोधात बेडगाव पोलिस मदत केंद्रात विविध कलमान्वये गुन्हा दाखल करण्यात आला. गडचिरोली जिल्ह्यात चंद्रपूर येथील मृद व जलसंधारण विभागामार्फत मोठ्या प्रमाणावर जलयुक्‍त शिवार योजनेची कामे करण्यात आली. कोरची तालुक्‍यातील बोरी ग्रामपंचायतीच्या हद्दीत हुडुकदुमा येथे दोन बंधारे मंजूर करण्यात आले. त्यासाठी शासनाने २१ लाख ४५ हजार ६७४ रुपयांची तरतूद केली. मात्र, कंत्राटदाराने अतिशय निकृष्ट दर्जाचे बांधकाम केले. याकडे मृद व जलसंधारण खात्याच्या अभियंता व अधिकाऱ्यांनी ही दुर्लक्ष केले. त्यामुळे हे बंधारे पहिल्याच पाण्यात वाहून गेले. याप्रकरणाची वाच्यता झाली त्यासोबतच सोशल मीडियावर देखील यावर चर्चा होऊ लागली. त्याची दखल घेत रोजगार हमी योजनेचे उपजिल्हाधिकारी यांच्या अध्यक्षतेखाली चौकशी समिती नेमण्यात आली. या चौकशी समितीने प्रत्यक्ष बंधाऱ्यावर जाऊन माहिती घेतली असता काम निकृष्ट दर्जाचे झाल्याचे उघडकीस आले.  जलयुक्‍त शिवार अभियान समितीचे अध्यक्ष समाधान शेंडगे यांनी कोरची नायब तहसीलदार रेखा बोके यांना प्राधिकृत करून बेडगाव पोलिस मदत केंद्रात तक्रार दाखल केली. तक्रारीनंतर पोलिस मदत केंद्रात उपविभागीय अभियंता वाय. जी. बरडे, कनिष्ठ अभियंता एम. टी. पेंदाम, कंत्राटदार शताब कुरेशी यांच्यावर गुन्हे दाखल करण्यात आले. कोरचीचे प्रभारी पोलिस अधिकारी विनोद गोडबोले यांच्या मार्गदर्शनात उपनिरीक्षक नीतेश पोटे याप्रकरणाचा तपास करीत आहेत. जलयुक्‍त शिवार अभियानातून जंगली भागात १६ पेक्षा अधिक बंधारे बांधण्यात आले आहेत. त्यांची दखील चौकशी करण्यात यावी, अशी मागणी या पार्श्‍वभूमीवर होत आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com