बियाणे न स्वीकारणाऱ्यांना ‘महाबीज'कडून रोख मोबदला

अकोला ः  या हंगामात ‘महाबीज’ने विक्री केलेले सोयाबीन बियाणे विविध कारणांमुळे उगवले नसल्याच्या तक्रारी आलेल्या आहेत. शासनाच्या आदेशानुसार ‘महाबीज’ यंत्रणेने नुकसानग्रस्त शेतकऱ्यांना बियाणे बदलून देण्याचे धोरण जाहीर केले. ज्या शेतकऱ्यांनी बियाणे घेण्यास नकार दिला त्यांना बियाण्याची किंमत दिली जात आहे. आतापर्यंत १९ लाख १२ हजार रुपये शेतकऱ्यांच्या खात्यात देण्यात आल्याची माहिती महाबीज प्रशासनाकडून देण्यात आली आहे. या खरीप हंगामात राज्यभरातील शेतकऱ्यांनी ‘महाबीज’च्या सोयाबीन बियाण्यास मोठ्या प्रमाणावर पसंती दिली होती. परंतु काही ठिकाणी हे बियाणे उगवले नसल्याच्या तक्रारी झाल्या. पडताळणी केल्यानंतर ‘महाबीज’कडून अशा शेतकऱ्यांना ३२५० क्विंटल १० किलो बियाणे पुन्हा पेरणीसाठी उपलब्ध करून देण्यात आले. यापैकी आजपर्यंत ६१० शेतकऱ्यांनी ५८ लाख लाख रुपयांचे ७७९ क्विंटल ९० किलो बियाण्याची उचल केली आहे. ज्या शेतकऱ्यांनी बियाणे घेण्यास नकार दिला, अशा शेतकऱ्यांना तालुकास्तरीय बियाणे तक्रार निवारण समितीचा अहवाल तसेच बाधित शेतकऱ्यांच्या बॅंक खात्याची माहिती घेवून, बियाणे किमतीची रक्कम त्यांच्या खात्यात जमा करण्याची प्रक्रिया सुरू करण्यात आली आहे.  आजपर्यंत १९ लाख १२ हजार शेतकऱ्यांच्या खात्यात जमा करण्यात आल्याची माहितीही महाबीज प्रशासनाकडून देण्यात आली आहे.