नगर जिल्ह्यातील दहा लाख जनावरे पाणीटंचाईच्या कचाट्यात

नगर  ः दुष्काळाच्या पाश्वर्भूमीवर लोकांना पिण्यासाठी पाणी देण्याचे नियोजन प्रशासन करीत आहे. लोकसंख्या गृहीत धरून टॅंकरने पाणी दिले जात आहे. मात्र पशुधनाचे काय, जनावरांसाठी पाणी अाणायचे कोठून असा प्रश्न अाता शेतकऱ्यांना पडू लागला आहे. जिल्ह्यातील सुमारे दहा लाख जनावरे पाणीटंचाईच्या कचाट्यात सापडले अाहेत. प्रशासनानेही जनावरांच्या पाण्याबाबत अजून तरी उपाययोजना केल्याचे दिसत नाहीत.

नगर जिल्ह्यात शेतीसोबत पशुधनाला प्राधान्य दिले जात अाहे. शेतीला दुग्ध व्यवसायाची जोड दिलेली असल्याने प्रत्येक शेतकऱ्यांच्या दारात किमान चार तरी जनावरे आहेत. अनेक तरुणांनी कर्ज काढून गाई, म्हशीचे गोठे उभे केले आहेत. मुळा, गोदावरी, प्रवरा नदीकाठच्या गावांतील लोकांना अजून फारशी पाणीटंचाई जाणवत नसली तरी दुष्काळी पट्ट्यातील पशुपालक शेतकरी मात्र अडचणीत सापडले अाहेत.

दुष्काळाच्या पार्श्वभूमीवर निर्माण झालेल्या पाणीटंचाईवर मात करण्यासाठी सध्या पाथर्डी, जामखेड, शेवगाव, कर्जत, पारनेर या भागात टॅंकरने पाणीपुरवठा केला जात आहे. मुळात उघड्यावर कोठेही पाणी नाही, जनावरांना चारा नाही. विहिरी आटत असल्याने टॅंकरद्वारे पाणीपुरवठा करण्याची गरज निर्माण झाली आहे. माणसांना टॅंकरने पाणी देता, पण जनावरांसाठी पाणी कोठून आणायचे असा प्रश्न पशुपालकांना पडला अाहे. चारा टंचाईबाबत चर्चा केली जाते, पण जनावरांसाठी पाण्याबाबत अजून कोणीही चर्चा केलेली नाही. त्याबाबत प्रशासनानेही नियोजन केले नाही.

२०१२ मधील पशुगणनेनुसार जिल्ह्यात १६ लाख ४८ हजार ५४८ गाई, म्हशी, ११ लाख ५३ हजार ८३६ शेळ्या, मेंढ्या व अन्य पशुधन अाहे. याशिवाय चार हजार घोडे, चौदाशे गाढवे, चौदा हजार वराहांची संख्या आहे. प्रती जनावरांना दररोज सरासरी दहा लिटर पाणी दिले तरी फक्त जनावरांसाठी तीन कोटी लिटर पाणी दररोज लागते. सध्याचा विचार करता सुमारे दहा लाख जनावरे पाणीटंचाईत सापडले आहेत. त्यामुळे आता जनावरांना पाणी उपलब्ध कोठून करायचे असा प्रश्न शेतकऱ्यांना पडला आाहे. प्रशासनाने जनावरांना लागणारे पाणी गृहीत धरून नियोजन करावे, अशी मागणी केली जात आहे.