पाचोरा, जि.जळगाव ः वरखेडी (ता.पाचोरा) येथील पशुधनाचा बाजार उद्यापासून (ता.१३) सुरू होणार आहे. हा बाजार मागील २३ मार्चपासून बंद करण्यात आला होता. यामुळे अनेक शेतकरी, पशुधनाचे व्यापारी यांचे नुकसान झाले आहे.
वरखेडी पशुधन बाजारात बैल, म्हशी, जातिवंत शेळ्या विक्रीसाठी येतात. दर गुरुवारी हा बाजार असतो. खरीप हंगाम अर्धा संपला तरी हा बाजार बंद असल्याने पशुधनाचे व्यापारी अडचणीत आले. ज्या शेतकऱ्यांना पशुधनाची विक्री करायची होती, त्यांनाही बाजार बंद असल्याने विक्री करता आली नाही. अनेक शेतकऱ्यांना जातिवंत बैल खरेदी करता आले नाहीत. महागडे बैल, म्हशी आणण्याची वेळ अनेकांवर आली.
सोशल डिस्टन्सिंगचे पालन करून हा बाजार सुरू करता येईल, यासाठी सभापती सतीश शिंदे यांनी शासनाकडे पाठपुरावा केला. त्याची दखल घेतली असून, हा बाजार कोरोनासंबंधीची खबरदारी, काळजी घेऊन सुरू करण्यासंबंधी परवानगी मिळाली आहे. तसेच भडगाव येथे शुक्रवारी आणि नगरदेवळा (ता.पाचोरा) येथेही दर सोमवारी पशुधनाचा बाजार सुरू होईल, अशी माहिती बाजार समितीने जाहीर केली आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.