बुलडाणा ः कापूस उत्पादनात सुरुवातीपासून अग्रेसर असलेल्या बुलडाणा जिल्ह्यात सीसीआयची कापूस खरेदी अद्यापही सुरू झालेली नसल्याने शेतकऱ्यांची मोठी गोची झाली आहे. जिल्ह्यात पाच खरेदी केंद्र असताना एकाही ठिकाणी खरेदी होत नाही. तर पणन महासंघाच्या चारपैकी दोन केंद्रांवर खरेदी सुरू असून तेथेही फारसा कापूस घेण्यात आलेला नसल्याची वस्तुस्थिती आहे.
शासनाने आदेश देत कापूस खरेदी सुरू करण्याचे सांगितले होते. परंतु कापूस खरेदीचा गुंता सुटलेला नाही. जिल्ह्यात सीसीआयचे पाच खरेदी केंद्र आहेत. नांदुरा, मलकापूर, खामगाव, चिखली व येरळी हे पाच केंद्र आहेत. यापैकी एकाही केंद्रावर खरेदी सुरू झालेली नाही. कापूस उत्पादक पणन महासंघाकडे असलेल्या चार केंद्रांपैकी शेगाव व देऊळगावराजा हे केंद्र सुरू झाले. या दोन्ही केंद्रांवर मिळून ५०० क्विंटल देखील कापसाची खरेदी झालेली नाही.
कापूस विक्री करणाऱ्या शेतकऱ्यांची नोंदणी मोठी असून कापूस खरेदी तुलनेने अत्यल्प होत आहे. एप्रिल महिना संपला असून आता केवळ एक महिना (मे) कापूस खरेदी होऊ शकेल. जूनमध्ये पाऊस सुरू होताच खरेदी बंद करण्यात येते. सध्या जेथे खरेदी सुरू आहे. त्याठिकाणी कापूस ग्रेडवरून मोठा गोंधळ सुरू आहे. केवळ एफएक्यू दर्जाचाच कापूस शासन खरेदी करीत आहेत. परिणामी आता शिल्लक असलेल्या दिवसांत किती खरेदी होईल हे केंद्र कार्यान्वित होण्यावर अवलंबून आहे. केंद्र खरेदीबाबत अद्याप कोणीही ठाम माहिती द्यायला तयार नाही.
सीसीआयकडील केंद्र नांदुरा, मलकापूर, खामगाव, चिखली, येरळी
पणन महासंघाचे केंद्र जळगाव जामोद, देऊळगावमही, शेगाव, देऊळगावराजा
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.