केंद्रीय कापूस संशोधन संस्था नोंदवतेय बोंड अळीचे निरीक्षण

नागपूर  ः फुलावर असलेल्या कापूस पिकावर सुरवातीलाच मोठ्या प्रमाणावर बोंड अळीचा प्रादुर्भाव झाल्याचा दावा केला जात होता; परंतु फुलधारणेच्या काळात कापसावर किती प्रादुर्भाव झाला याची नेमकी टक्‍केवारी जाणून घेण्यासाठी केंद्रीय कापूस संशोधन संस्थेच्या वतीने विविध जिल्ह्यांतील प्रक्षेत्रांना भेटी दिल्या जात आहेत.

फुलअवस्थेतील कापूस पिकावर काही जिल्ह्यांत ५०, काही जिल्ह्यांत ८० टक्‍के बोंड अळीचा प्रादुर्भाव झाल्याची चर्चा होत होती. याचवेळी केंद्रीय कापूस संशोधन संस्थेचे माजी संचालक डॉ. सी. डी. मायी यांनी १० ते १२ टक्‍केच प्रादुर्भाव असल्याचे सांगितले होते. शेतकऱ्यांमध्येदेखील नेमका प्रादुर्भाव किती झाला, याविषयी मतभिन्नता होती. हा गोंधळ दूर व्हावा याकरिता केंद्रीय कापूस संशोधन संस्थेने जिल्हानिहाय सर्व्हेक्षणाची मोहीम हाती घेतल्याची माहिती आहे.

केंद्रीय कापूस संशोधन संस्थेचे तज्ज्ञ सध्या विदर्भातील काही जिल्ह्यांमध्ये जाऊन त्या ठिकाणच्या परिस्थितीचा आढावा घेत आहेत. या माध्यमातून संबंधित जिल्ह्यांत बोंड अळीचा प्रादुर्भाव किती आणि कोणत्या स्तरावर आहे, याविषयी जाणून घेता येणार आहे. वाशीम, यवतमाळ जिल्ह्यात संस्थेच्या तज्ज्ञांनी दौरे करून या संदर्भाने माहिती घेतल्याचे सांगण्यात आले.