गुलाबी बोंड अळी व्यवस्थापन प्रकल्पाची राष्ट्रीय पथकाकडून पाहणी

जालना : जिल्ह्यातील वखारी येथील कपाशीमधील गुलाबी बोंड अळी व्यवस्थापन प्रकल्पाची राष्ट्रीय समीक्षा पथकाकडून पाहणी करण्यात आली. प्रकल्पांतर्गत एकात्मिक पद्धतीने गुलाबी बोंड अळी व्यवस्थापनाच्या फलश्रुतीची माहिती पथकाने जाणून घेतली.  कृषी विज्ञान केंद्र (खरपुडी) व राष्ट्रीय एकात्मीक कीड व्यवस्थापन केंद्र (नवी दिल्ली) यांच्या संयुक्‍त विद्यमाने वखारी येथे साठ एकरावर एकात्मिक किड व्यवस्थापनातून गुलाबी बोंड अळी नियंत्रणाचा प्रकल्प राबविण्यात आला. या प्रकल्पाला नुकतीच राष्ट्रीय स्तरावरील समीक्षा पथकाने भेट देऊन पाहणी केली. या वेळी शेतकऱ्यांशी संवादही पथकाच्या सदस्यांनी साधला. पथकामध्ये इंफाळ येथील केंद्रीय कृषी विद्यापीठाचे माजी कुलगुरू डॉ. एस. एन. पुरी, भारतीय कृषी संशोधन संस्था दिल्ली येथील कीटकशास्त्र विभागाचे माजी प्रमुख डॉ. एस. एन. सुशील, डॉ. टी. व्ही. सिंग, डॉ. एस. के. लोधा, राष्ट्रीय एकात्मीक कीड व्यवस्थापन केंद्र नवी दिल्लीचे संचालक डॉ. एच. आर. सरदाना यांचा समावेश होता.  शेतकरी निवृत्ती घुले, बळिराम घुले, सोपान घुले, रमेश काळे, श्रीराम आटोळे, दामोधर घुले, गजानन घुले, प्रल्हाद खैरे आदींनी प्रकल्पाच्या अंमलबजावणीमुळे गुलाबी बोंड अळीवर बऱ्यापैकी नियंत्रण मिळवीने शक्‍य झाल्याची माहिती पथकाला दिली. वरिष्ठ शास्त्रज्ञ तथा कृषी विज्ञान केंद्राचे प्रमुख एस. व्ही. सोनुने यांनी कार्यक्रमाचे प्रास्ताविक केले. प्रकल्प प्रमुख डॉ. अजंता बिराह यांनी प्रकल्पाची सविस्तर माहिती दिली.  समीक्षा पथकाचे अध्यक्ष डॉ. पुरी यांनी प्रकल्पांतर्गत झालेल्या कामाविषयी समाधान व्यक्‍त केले. सूत्रसंचालन डॉ. अनुपकुमार यांनी; तर कीटकशास्त्रज्ञ प्रा. अजय मिटकरी यांनी आभार मानले.