केंद्रीय पथक आज करणार पीकहानीची पाहणी

central team on visit in state
central team on visit in state

पुणे ः मॉन्सूनोत्तर पावसामुळे राज्यात शेतीच्या झालेल्या हानीची माहिती केंद्रीय पथकाला दिली जाणार आहे. दरम्यान, पथकाला पोलिस संरक्षण देण्याचे आदेश देण्यात आलेले आहेत.  पीक नुकसानीचा आढावा व शेतीची पाहणी करण्यासाठी गुरुवारी (ता. २१) केंद्रीय पथक राज्यात दाखल झाले. राष्ट्रीय आपत्ती व्यवस्थापन प्राधिकरणाचे अतिरिक्त सचिव डॉ. व्ही. थिरूपुगर्झ, केंद्रीय अर्थमंत्रालयाच्या खर्च विभागाचे सल्लागार डीना नाथ, केंद्रीय कृषी मंत्रालयाचे संचालक के. मनोहरन, कापूस संचालनालयाचे संचालक डॉ. आर. पी. सिंग, कडधान्य संचालनालयाचे संचालक डॉ. सुभाष चंद्र यांचा या पथकात समावेश आहे.  औरंगाबाद, अमरावती, नागपूर व नाशिक या विभागांतील जिल्ह्यांमध्ये पथक जाणार आहे. विभागीय आयुक्त व जिल्हाधिकाऱ्यांकडून या पथकांना अहवाल दिला जाईल, तसेच सादरीकरणदेखील होईल. पथकाने केलेल्या अहवालावरच केंद्रातून हजारो कोटींची मदत मिळणार असल्याने राज्याची यंत्रणा काटेकोर नियोजन करीत आहे.  “पथकाकडून २४ नोव्हेंबरपर्यंत राज्यातील स्थिती जाणून घेतली जाईल. शेतीच्या नुकसानीबाबत केंद्र शासनाच्या अधिकाऱ्यांना कोणतीही शंका असल्यास त्याचे निरसन होण्यासाठी अत्यावश्यक कागदपत्रे व शेतकऱ्यांची माहिती पुरवावी असे आदेश आम्ही दिले आहेत,’’ अशी माहिती महसूल विभागाच्या सूत्रांनी दिली.  केंद्रीय पथकाला नेमक्या कोणत्या जिल्ह्यात, कोणत्या गावात न्यायचे, तसेच काय माहिती द्यायची याचे नियोजन करण्याचे काम विभागीय आयुक्तांकडे देण्यात आलेले आहेत. राज्यातील आयुक्त गेल्या दोन दिवसांपासून याच नियोजनात गुंतलेले होते.  “केंद्रीय पथकाला राज्य अतिथी म्हणून दर्जा देण्यात आलेला आहे, त्यामुळे पोलिस संरक्षणात संपूर्ण दौरे केले जातील. पथकासमोर काहीही अनुचित प्रकार घडून राज्याच्या प्रशासनाबाबत उलटसुलट संदेश केंद्रात जाऊ नये म्हणून काळजी घेण्याच्या सूचना विभागीय आयुक्त, जिल्हाधिकारी व कृषी विभागाला देण्यात आलेल्या आहेत. पीकविमा व पीकपंचनामे अशा दोन्ही मुद्द्यांवर काही भागांत शेतकऱ्यांमध्ये नाराजी असल्याने आंदोलनात्मक कृतीला पथकाला सामोरे जावे लागू नये यासाठी आम्हाला काळजी घ्यावी लागत आहे,’’ असे महसूल विभागाच्या सूत्रांनी स्पष्ट केले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com