भाजीपाला विकण्याचे शेतकऱ्यांपुढे आव्हान; संचारबंदीमुळे अनंत अडचणी

कोल्हापूर : ‘ब्रेक द चेन’च्या नवीन नियमावलीअंतर्गत आठवडी बाजार बंद असल्याने भाजीपाला उत्पादक शेतकऱ्यांत अस्वस्थता पसरली आहे. अनेक गावांमध्ये गावातील प्रमुख ठिकाणी बसून शेतकरी भाजीपाला विक्री करत असल्याचे चित्र आहे. परंतु संचारबंदीमुळे आवश्‍यक त्या प्रमाणात नागरिक बाहेर पडत नसल्याने त्याचा भाजीपाला विक्रीवरही पडत आहे. काढलेला भाजीपाला विकण्याचे आव्हान शेतकऱ्यांपुढे उभे राहिले आहे. लॉकडाऊन सुरु होण्यापूर्वी ग्रामीण भागात सुरक्षित अंतर ठेवून आठवडी बाजार सुरु होते. निर्बंध कडक करण्याचे ठरल्यानंतर ग्रामपंचायतींनी मास्क सक्तीचे करीत बाजारावर परिणाम होवू दिला नव्हता. परंतु ही नियमावली जाहीर झाल्यानंतर मात्र आठवडी बाजारावर परिणाम झाला आहे. प्रत्येक गावात स्थानिक पातळीवर निर्णय घेतले जात आहेत. शहरी भागातील बाजारसमित्या, बाजारपेठेत सौदे सुरु असल्याने गावातही बाजार सुरु करावेत अशी मागणी शेतकऱ्यांची आहे. पण संसर्ग वाढण्याचा धोका असल्याने ग्रामपंचायतीनी सावध पवित्रा घेतला आहे. यामुळे लॉकडाउनच्या पहिल्या दिवशी जागा मिळेल त्या ठिकाणी बसून शेतकऱ्यांनी किरकोळ प्रमाणात भाजीपाला विक्री केली. अद्याप लॉकडाऊनचा कालावधी जादा असल्याने आता पुढील पंधरा दिवसांचे नियोजन कसे करायचे या चिंतेत भाजीपाला उत्पादक आहेत. प्रतिक्रिया.. जर ग्राहकांनी पुरेशी खरेदी केली नाही तर अतिरिक्त भाजीपाला होऊन दर घसरू शकतात. याउलट निर्बंध कडक केले तर भाजीपाल्याची काढणी कमी होऊन चणचण निर्माण होवू शकते. सध्या तरी पुढील दिवसांत शासनाने बाजाराबाबत काय धोरण जाहीर होइल व त्याची अंमलबजावणी ग्रामस्तरावर कशी होइल याबाबत नक्की सांगता नाही. भाजीपाल्याची दररोज किती काढणी करायची याबाबत नेमका अंदाज आम्हाला येत नाही. यामुळे नुकसान होण्याची शक्‍यता जादा आहे. - अप्पासाहेब पाटील,  मौजे सांगाव, जि. कोल्हापूर