राज्य बँक घोटाळाप्रकरणी दोषींवर कारवाई करणार : मुख्यमंत्री देवेंद्र फडणवीस

जळगाव  ः महाराष्ट्र राज्य सहकारी बँक घोटाळाप्रकरणी न्यायालयाने जे आदेश दिले आहेत, त्यासंबंधी शासन दोषींवर कारवाई करणार आहे, असे मुख्यमंत्री देवेंद्र फडणवीस यांनी धुळे येथे गुरुवारी (ता. २२) महाजनादेश यात्रेदरम्यान आयोजित सभेत स्पष्ट केले. 

महाजनादेश यात्रा शुक्रवारी (ता. २३) जळगाव जिल्ह्यात दाखल झाली. यात्रा धुळ्यातून धरणगाव येथे पोचली. तेथे त्यांचे स्वागत करण्यात आले. यानंतर यात्रा जळगावात दखल झाली. जळगाव शहरातील सागर पार्क मैदानात सभा झाली. या वेळी जलसंपदामंत्री गिरीश महाजन, अन्न व नागरीपुरवठा मंत्री जयकुमार रावल, भाजपचे प्रदेश उपाध्यक्ष अशोक कांडेलकर, खासदार रक्षा खडसे, उन्मेष पाटील, आमदार एकनाथ खडसे, हरिभाऊ जावळे, सुरेश भोळे, संजय सावकारे, स्मिता वाघ, चंदूलाल पटेल, जिल्हा परिषदेच्या अध्यक्षा उज्ज्वला पाटील, महापौर सीमा भोळे, भाजपचे जिल्हाध्यक्ष डॉ. संजीव पाटील, उपमहापौर अश्‍विन सोनवणे आदी उपस्थित होते.  

श्री. फडणवीस म्हणाले की ,भाजपला जळगावने नेहमीच साथ दिली आहे. मतदारांचा हा विश्‍वास कायम राहायला हवा. जळगावमध्ये जे प्रश्‍न अनेक वर्षे रखडलेले होते. त्यांना मंजुरी मिळाली आहे. अनेक आश्‍वासने पूर्ण करून कामे हाती घेतली आहेत. विकासाची गती अशीच कायम ठेवू. दुष्काळमुक्तीच्या दिशेने राज्याची वाटचाल सुरू आहे. अनेक महत्त्वाकांक्षी सिंचन प्रकल्प मार्गी लावले जातील. त्यात जळगाव जिल्ह्यातील प्रकल्पदेखील हाती घेतले जातील. जळगाव शहरातील प्रलंबित प्रश्‍न सोडविले आहेत, असेही ते म्हणाले. भुसावळ व जामनेर येथेही मुख्यमंत्री फडणवीस यांनी नागरिकांशी संवाद साधला.