शेतकऱ्यांना अपेक्षित राज्य कारभार करेन: मुख्यमंत्री

शिवनेरी, जि. पुणे : शिवरायांच्या महाराष्ट्राचा मुख्यमंत्री म्हणून मी जिजाऊंच्या चरणी नतमस्तक झालो आहे. जसा जिजाऊंना अपेक्षित राज्य कारभार होता, तसाच गोरगरीब जनता आणि शेतकऱ्यांना अपेक्षित राज्य कारभार करेन, असे प्रतिपादन मुख्यमंत्री उद्धव ठाकरे यांनी येथे केले. मुख्यमंत्री झाल्यानंतर श्री. ठाकरे प्रथमच गुरुवारी (ता. १२) शिवनेरी येथे आले होते. छत्रपती शिवाजी महाराज यांचे जन्मस्थळ असलेल्या शिवनेरीवरील शिवजन्माच्या वास्तूत दर्शन घेत, शिवकुंज इमारतीमधील जिजाऊ आणि बालशिवाजींच्या पुतळ्यास मुख्यमंत्री ठाकरे यांनी अभिवादन केले.  या वेळी रश्मी ठाकरे, आमदार आदित्य ठाकरे, आमदार अतुल बेनके, उपनेते माजी खासदार शिवाजीराव आढळराव पाटील, जिल्हाधिकारी नवल किशोर राम, जिल्हा पोलिस अधीक्षक संदीप पाटील, माजी आमदार शरद सोनवणे, शिवसेनेचे जिल्हाप्रमुख माउली कटके, जुन्नर तालुकाप्रमुख माउली खंडागळे, नगराध्यक्ष श्‍याम पांडे आदी मान्यवर उपस्थित होते.  मुख्यमंत्री ठाकरे म्हणाले, ‘‘आपले सगेसोबती थोडे बदलले आहेत. जुने बरोबर आहेतच. त्यामुळे मजबूत टीम तयार झाली असून, जगाला अभिमान वाटेल असा महाराष्ट्र घडवूया.’’