‘वान’च्या पाणी आरक्षणाला मुख्यमंत्र्यांनी दिली स्थगिती

वान प्रकल्प
वान प्रकल्प

अकोला  ः जिल्ह्यातील वान प्रकल्पातून अकोला शहरासाठी २४ दलघमी पाणी आरक्षण करण्याच्या निर्णयाला मुख्यमंत्र्यांनी मंगळवारी (ता. १०) सायंकाळी तातडीने स्थगिती दिली. यामुळे अकोट, तेल्हारा तसेच संग्रामपूर तालुक्यांमध्ये शासनाच्या विरुद्ध वाढत चाललेला विरोध शांत होण्याची शक्यता आहे. अकोटचे आमदार प्रकाश भारसाकळे यांनी पाणी आरक्षणावरून होत असलेला विरोध मुख्यमंत्र्यांपर्यंत पोचविला होता. जिल्ह्यातील वान प्रकल्पावरून अकोला शहराला वाढीव पाणीपुरवठ्यासाठी २४ दलघमी पाणी आरक्षण करण्यास शासनाने काही दिवसांपूर्वी मंजुरी दिली होती. त्यावरून जिल्ह्यातील अकोट, तेल्हारा तसेच बुलडाणा जिल्ह्यातील संग्रामपूर तालुक्यातील शेतकऱ्यांनी विरोध करण्यास सुरुवात केली. याबाबत आमदारांनाच शेतकऱ्यांनी धारेवर धरले होते. त्यानंतर जिल्हाधिकाऱ्यांना निवेदत देत मंगळवारी तेल्हारा, अकोट तालुका बंदीची हाक देण्यात आली. दिवसभर कडकडीत बंद पाळण्यात आला. नागरिकांनी पाणी आरक्षणाच्या मुद्याला केलेला विरोध हा नुकसानकारक ठरू शकतो. जनक्षोभ वाढतच असल्याने अखेर मंगळवारी रात्री उशिरा पाणी आरक्षणाला स्थगिती देण्याचा निर्णय मुख्यमंत्र्यांनी घेतला असल्याचे आमदार प्रकाश भारसाकळे यांनी सांगितले. अकोला शहराच्या वाढीव पाणीपुरवठ्यासाठी वान प्रकल्पातून पाणी आरक्षण करताना सिंचनाचा विचार केला गेला नव्हता हे स्पष्ट झाले. पिण्याच्या पाण्याला प्राधान्य लक्षात घेता पाणी आरक्षण दिले असले तरी सिंचनात होणारी कपात हा मुद्दा समोर करून शेतकऱ्यांनी शासनाच्या निर्णयाविरुद्ध मोठा रोष व्यक्त केला. सिंचनामध्ये अकोला शहराच्या पाणी आरक्षणामुळे बाधा येणार नाही. शेतकऱ्यांमध्ये असलेला संभ्रम दूर करण्याचा प्रयत्न झाला. मात्र शेतकऱ्यांचा विरोध सुरू असल्याने आ. भारसाकळे यांनी मुख्यमंत्री देवेंद्र फडणवीस यांच्यासोबत चर्चा करून पाणी आरक्षण आदेशाला तातडीने स्थगिती द्यावी, अशी विनंती केली. अखेरीस मुख्यमंत्र्यांनी स्थितीचा आढावा घेऊन पाणी आरक्षण आदेशला स्थगिती दिली आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com