औरंगाबादेत होणार अंडीपुंजनिर्मिती केंद्र

चिकलठाणा येथे अंडीपुंजनिर्मिती केंद्राची स्थापना करण्यासाठीच्या खर्चाच्या अंदाजपत्रकास प्रशासकीय मान्यता देण्यात आल्याने केंद्र उभारणीचा मार्ग मोकळा झाला आहे.
औरंगाबादेत होणार अंडीपुंजनिर्मिती केंद्र
औरंगाबादेत होणार अंडीपुंजनिर्मिती केंद्र

औरंगाबाद : रेशीम शेती व उद्योगाला चालना देण्यासाठी औरंगाबाद शहरालगतच्या चिकलठाणा येथे अंडीपुंजनिर्मिती केंद्राची स्थापना करण्यासाठीच्या खर्चाच्या अंदाजपत्रकास प्रशासकीय मान्यता देण्यात आल्याने केंद्र उभारणीचा मार्ग मोकळा झाला आहे. पायाभूत सुविधांची निर्मिती व सुविधांचे बळकटीकरण या निधीतून करण्यात येणार आहे. या केंद्रामध्ये अंडीपुंजनिर्मिती केंद्राच्या इमारतीसह प्रशासकीय इमारत, कोल्ड स्टोअरेज, कर्मचारी निवासस्थाने, चॉकी संगोपन केंद्र, कीटक संगोपन केंद्र व शेतकरी निवास प्रशिक्षण केंद्र आदी सोयीसुविधा उभारण्यात येणार आहेत. राज्यात रेशीम कोष उत्पादक शेतकऱ्यांना अंडीपुंजाचा तुटवडा भासू नये. अंडीपुंज उत्पादनाबाबत महाराष्ट्र स्वयंपूर्ण व्हावे म्हणून निर्मिती केंद्र, शेतकरी प्रशिक्षण केंद्र व सोयी सुविधांच्या निर्मितीसाठी २७ कोटी खर्चाच्या अंदाजपत्रकास प्रशासकीय मान्यता देण्याबाबतचा प्रस्ताव संचालक रेशीम यांनी सादर केला होता. यानंतर सार्वजनिक बांधकाम विभागाने छाननी अंति २१ कोटी ७३ लाख ४६ हजार रुपये निधीस सहमती दर्शवली होती.  या प्रकल्पाच्या बांधकामावरील खर्च १५ कोटी रुपयांपेक्षा जास्त असल्याने नियोजन विभागाच्या ११ जून २०१८ रोजीच्या शासन परिपत्रकातील तरतुदीनुसार हा प्रस्ताव सचिव समितीच्या बैठकीत मान्यतेसाठी सादर करण्यात आला होता. या बैठकीत सचिव समितीने औरंगाबाद येथे प्रस्तावित अंडीपुंजनिर्मिती केंद्रासाठी मुबलक पाणी, मलबेरी लागवडीसाठी पोषक, वातावरण तसेच अशा पद्धतीचा प्रकल्प सद्यःस्थितीत कार्यरत असणाऱ्या कृषी विद्यापीठांमध्ये प्रायोगिक तत्त्वावर राबविता येईल का, याबाबत खातरजमा करून आवश्यकता असल्यास फेरप्रस्ताव सचिव समितीस सादर करावा, अशी सूचना केली होती. त्या अनुषंगाने चिकलठाणा (जि. औरंगाबाद) येथील अंडीपुंजनिर्मिती केंद्र उभारण्याच्या प्रस्तावास केंद्रीय रेशीम मंडळ बंगळूर यांच्या व्यवहार्यता अहवालाच्या अधीन राहून समितीने मान्यता दिली आहे.  पायाभूत सुविधा उपलब्ध असल्याशिवाय रेशीम उद्योगाला चालना देणे अशक्य. अंडीपुंजनिर्मिती केंद्र व इतर सोयीसुविधा उभारणीचा मार्ग मोकळा होणे हा रेशीम उद्योगात मैलाचा दगड ठरेल. - दिलीप हाके,  उपसंचालक रेशीम, औरंगाबाद

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com