शेतकऱ्यांचे नाही, तर श्रीमंतांचे चौकीदार : प्रियांका गांधी

प्रयागराज, उत्तर प्रदेश : "गेल्या काही काळापासून शेतकरी अडचणीत सापडला आहे. शेतकऱ्यांच्या मदतीसाठी कोणीही पुढे येत नाही. चौकीदार हे शेतकऱ्याचे नाही तर श्रीमंतांचे असतात. असे असताना केंद्र सरकार उद्योगपती मित्रांसाठी हजारो-कोट्यवधी रुपये देत आहे,’’ अशी टिका कॉंग्रेसच्या प्रदेश सरचिटणीस प्रियांका गांधी यांनी येथे केली.  लोकसभेच्या रणधुमाळीला रंग चढत असून कॉंग्रेसच्या सरचिटणीस श्रीमती गांधी यांच्या उत्तर प्रदेश दौऱ्याला सोमवार (ता.१८) पासून प्रारंभ झाला आहे. प्रयागराज येथे हनुमान मंदिरात दर्शन घेऊन संगम येथे पूजा केली. त्यानंतर क्रूझ बोटीतून प्रयागराजहून वाराणसीकडे त्या तीन दिवसांच्या दौऱ्यासाठी रवाना झाल्या. बोटीतून दौरा सुरू करण्यापूर्वी प्रियांका गांधी यांनी दुमदुमा घाट येथे उपस्थितांशी संवाद साधला. या वेळी त्यांनी मोदी सरकारच्या धोरणावर जोरदार टीका केली. त्या म्हणाल्या, "चौकीदार हे शेतकऱ्यांचे नाही तर श्रीमंतांचे असतात. राज्यातच नाही तर देशात अनेक ठिकाणी पिकांना हमीभाव मिळत नसल्याचे चित्र आहे. आज देश आणि देशाची घटना संकटात आहे.’’

मोदींच्या मतदारसंघात...  प्रयागराज ते वाराणसी हे शंभर किलोमीटरचे अंतर बोटीतून पार करण्यात येणार आहे. वाराणसी हा पंतप्रधान नरेंद्र मोदी यांचा मतदारसंघ आहे. उत्तर प्रदेशात कॉंग्रेसची स्थिती मजबूत करण्यासाठी प्रियांका यांचा दौरा महत्त्वाचा ठरणार आहे.