नगर जिल्ह्यात सव्वाचार लाख हेक्‍टर क्षेत्राचे पंचनामे पूर्ण

नगर जिल्ह्यात सव्वाचार लाख हेक्‍टर क्षेत्राचे पंचनामे पूर्ण
नगर जिल्ह्यात सव्वाचार लाख हेक्‍टर क्षेत्राचे पंचनामे पूर्ण

नगर ः मागील महिन्यात झालेल्या अतिवृष्टीमुळे खरीप हंगामातील पिकांचे मोठ्या प्रमाणावर नुकसान झाले. आजअखेर चार लाख २८ हजार हेक्‍टर बाधित क्षेत्राचे पंचनामे पूर्ण झाले आहेत. अतिवृष्टीचा साडेपाच लाखांपेक्षा जास्त शेतकऱ्यांना फटका बसला आहे असल्याचे दिसून येत आहे. अजूनही कृषी विभागाचे लोक काही शेतकऱ्यांपर्यंत पोचले नसल्याचे सांगितले जात आहे. 

नगर जिल्ह्यामध्ये ऑक्‍टोबर महिन्यात जिल्ह्यात तब्बल २०० मिलिमीटर असा उच्चांकी पाऊस झाला. या पावसाने खरीप हंगामातील पिकांचे मोठ्या प्रमाणात नुकसान झाले आहे. विधानसभा निवडणुकीसाठी मतदान आणि मतमोजणी सुरू असताना पावसाने जिल्ह्यात कहर केला. घटलेला जलस्तर वाढला आहे; मात्र पावसाने बाजरी, मका, सोयाबीन, कांदा, कपाशी, फळबागा आदी पिकांचे मोठे नुकसान झाले आहे. 

झालेल्या नुकसानीचे पंचनामे करण्याचे काम सुरू असल्याचे प्रशासनाकडून सांगितले जात आहे. मात्र, पंचनाम्याची गती कमी आहे. त्यामुळे पाऊस उघडून आठ दिवस झाले तरी अजूनही काही शेतकऱ्यांच्या बांधावर कृषी विभागाचे अधिकारी पोचले नाहीत, असे सांगितले जात आहे. 

आजअखेर जिल्ह्यातील चार लाख २८ हजार हेक्‍टरचे पंचनाम्यांचे काम झाले. जिल्ह्यातील बाधित शेतकऱ्यांची संख्या पाच लाख ७० हजार आहे. त्यामुळे सुरवातीला आलेल्या नजर अंदाजापेक्षा नुकसानीची संख्या अधिक असल्याचे समोर येत आहे. 

मदत कधी मिळणार? राज्यात विधानसभा निवडणुकीनंतर महिनाभरातही सरकार झाले नाही. आता राष्ट्रपती राजवट लागू झाली असून सत्तेसाठी नेते मुंबईत तळ ठोकून आहेत. त्यामुळे ऐन दिवाळीत अवकाळी पावसाचे संकट कोसळलेल्या शेतकऱ्यांना आधार मिळाला नाही. केवळ पंचनाम्याचे सोपस्कर पूर्ण केले जात असले तरी मदत नेमकी कधी मिळणार असा प्रश्न शेतकऱ्यांना पडला आहे. निवडून दिलेले आणि पराभूत झालेले नेतेही त्याबाबत काहीच बोलत नाहीत.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com