सहकारी सोसायट्यांनी उत्पन्नवाढीसाठी इतर व्यवसाय करावे : पणन संचालक

पुणे : शेतकरी कंपन्यांना कर्जपुरवठा, व्यवसाय करण्यावर मर्यादा येत आहे; त्या आधीपासून सहकारी सोसायट्या शेतकऱ्यांना कर्जपुरवठा करतात. हे सर्वांत मोठे काम आहे. मात्र, उत्पन्नवाढीसाठी सहकारी संस्थांनी इतर व्यवसाय करावेत, असे मत पणन संचालक डॉ. किशोर तोष्णीवाल यांनी व्यक्त केले.

सहकार, पणन व वस्त्रोद्योग विभागाच्या वतीने लोकसंवाद मोहीम व अटल महापणन पुरस्कार वितरण समारंभ गुरुवारी (ता. ५) आयोजित केला होता, त्या वेळी तोष्णीवाल बोलत होते. या वेळी पुणे ग्रामीणच्या सहकारी संस्थेचे जिल्हा उपनिबंधक डॉ. अशोक कुंभार, सहायक निबंधक सुनंदा जाधव, आर. एन. जगताप उपस्थित होते. या वेळी जाधववाडी (जुन्नर), भराडी (आंबेगाव), दोंदे (खेड), भाजे (मावळ), मुळशी (मुळशी), न्हावी (भोर), कर्नलवाडी (पुरंदर), लोणी भापकर (बारामती), कालठण (इंदापूर), पारगाव (दौंड), मांडवगण फराटा (शिरूर), थेऊर (हवेली), सविंदणे (शिरूर) येथील सोसाट्यांच्या सर्वोत्कृष्ट काम करणाऱ्या सचिवांना पुरस्काराने गौरविण्यात आले. बारामती, जुन्नर, आंबेगाव या खरेदी-विक्री संघांच्या व्यवस्थापकांना पुरस्कार देण्यात आला.

श्री. तोष्णीवाल म्हणाले, ‘‘सहकारी संस्थांचे कर्जपुरवठ्याच्या माध्यमातून येणाऱ्या उत्पन्नाऐवजी इतर व्यवसायातून उत्पन्न वाढविण्याची गरज आहे. अटल महापणनच्या माध्यमातून वेगळी वाट धरण्याची संधी मिळाली आहे. आज ग्रामीण भागात नागरिकांमध्ये बदल होत आहेत. पंच समितीचा सहभाग खूप आवश्यक आहे. पुणे जिल्ह्यात ९२ संस्थांनी व्यवसाय सुरू केले आहेत, त्यासोबतच इतरही संस्थांनी व्यवसाय हाती घावेत.’’

डॉ. कुंभार म्हणाले, ‘‘अटल महापणनच्या माध्यमातून जे काम झाले आहे, ते काम लोकांपर्यंत पोचण्याची गरज आहे. म्हणून, लोकसंवाद मोहीम राबविण्यात येत आहे. कार्यकारी सोसाट्यांनी व्यवसाय सुरू केले आहेत. आता फक्त एकाच व्यवसायावर अवलंबून न राहता लोकांना गरज असलेले व्यवसाय करावेत. काही संस्थांना संस्थेच्या सभासदांना गरज लक्षात घेऊनही व्यवसाय सुरू करता येईल. त्यासाठी आवश्यक असलेले प्रशिक्षण देण्यात येईल.’’ स्वप्नील फुंदे यांनी प्रास्तविक केले.