सिंधुदुर्गनगरी ः जिल्ह्यातील नेरूर कर्याद नारूर (ता. कुडाळ) येथील मनीषा कालिदास सावंत यांच्या मालकीच्या नारळ बागेला आग लागल्यामुळे बागेतील सुमारे ४५ झाडे आणि जलवाहिनी जळाली. यामध्ये त्यांचे सुमारे पाच लाखांचे नुकसान झाले आहे.
कुडाळ तालुक्यातील नेरूर कर्याद नारूर येथील सौ. सावंत यांच्या बागेला गुरुवारी दुपारी अचानक आग लागली. कडक ऊन आणि गवत यामुळे आगीचा भडका उडाला. या आगीत सौ. सावंत यांच्या मालकीची उत्पादनक्षम सुमारे ४५ झाडे जळाली. तर बागेतील पाइपलाइन जळून खाक झाली आहे. आगीत सुमारे पाच लाखांचे नुकसान झाले आहे. ही आग नजीक सुरू असलेल्या मोबाईल टॉवरचे काम करताना लागल्याचे शेतकऱ्यांकडून सांगितले जात आहे. या नुकसानीसंदर्भात तहसीलदार, दूरसंचार अधिकारी यांना लेखी निवेदन सौ. सावंत यांनी दिले आहे. नुकसानीचा पंचनामा तलाठी व्ही. एस. शेणवी यांनी केला आहे.
आगीचे सत्र सुरूच जिल्ह्यात मागील काही दिवसांपासून आगीचे सत्र सुरूच आहे. सध्या काजू, हापूस आंबा याचा हंगाम सुरू आहे. बागेत आंबे आणि काजू ही तोडणीस तयार असल्याने सद्यःस्थितीत आग लागल्याने लाखो रुपयांचे नुकसान होत आहे. अशा घटनांमुळे बाग मालकांना याचा मोठा फटका बसत असल्याने तत्काळ नुकसानभरपाई मिळावी, अशी मागणी जोर धरू लागली आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.