पूर्व विदर्भात थंडी वाढली

पुणे ः गेल्या आठवड्यापासून राज्यात थंडीस सुरुवात झाली आहे. राज्यातील जवळपास सर्वच भागांत थंडी वाढली आहे. शुक्रवारी (ता.६) यवतमाळ, गोंदियात १२ अंश सेल्सिअसपर्यंत तापमानात घट झाली आहे. सकाळी आठ वाजेपर्यंत परभणी कृषी विद्यापीठ येथे ११.० अंश सेल्सिअस एवढ्या किमान तापमानाची नोंद झाली असल्याचे सूत्रांनी सांगितले. सध्या दिवसभर ऊन पडत असले, तरी सायंकाळनंतर हवेत काही प्रमाणात गारवा तयार होत आहे. विदर्भातील अनेक भागांत किमान तापमानात सरासरीच्या तुलनेत दोन ते सहा अंश सेल्सिअसपर्यंत घट होऊन ११ अंश सेल्सिअसपर्यंत तापमान खाली आले आहे. तर चंद्रपूर येथे ११.६ अंश सेल्सिअस तर यवतमाळ, गोंदिया, या भागांत १२ अंश सेल्सिअसपर्यंत पारा घसरला आहे. मराठवाड्यातही थंडीने चांगलेच हातपाय पसरले आहेत. परभणी कृषी विद्यापीठानंतर परभणी शहरातही चांगलीच थंडी होती. औरंगाबाद, नांदेड, उस्मानाबाद या भागांतही थंडी वाढली असून, किमान तापमानात चांगलीच घट झाली आहे. अनेक ठिकाणी किमान तापमान सरासरीपेक्षा खाली आले आहे. मध्य महाराष्ट्र व खानदेशातही थंडी वाढली आहे. निफाड येथील गहू संशोधन केंद्रामध्ये १२ अंश सेल्सिअस एवढे किमान तापमान नोंदविले गेले. तर पुणे, महाबळेश्वर, नाशिक, जळगाव, सोलापूर या भागांतही किमान तापमानात चांगलीच घसरण झाली आहे. या भागात सरासरीच्या तुलनेत दोन ते चार अंश सेल्सिअसने घट झाली आहे. कोकणातील अनेक भागांत थंडीत वाढ होऊ लागली आहे. मुंबई, रत्नागिरी, अलिबाग, डहाणू येथील किमान तापमानात घट झाली असून, पारा २० अंश सेल्सिअसपर्यंत घसरला आहे. शुक्रवारी (ता.६) सकाळपर्यंत विविध शहरातील किमान तापमान, कंसात वाढ, घट झालेले तापमान, अंश सेल्सिअसमध्येः मुंबई (सांताक्रूझ) २१ (-१), अलिबाग २०.९ (-१), ठाणे २४.०, रत्नागिरी २०.० (-२), डहाणू २२ (-१), पुणे १३.८ (-२), जळगाव १३.६ (-३), कोल्हापूर १७.६ (-१), महाबळेश्वर १४.६ (-१), मालेगाव १५.६(-१), नाशिक १३.७ (-२), निफाड १२.०, सांगली १६.४ (-२), सातारा १४.९ (-२), सोलापूर १५.३ (-४), औरंगाबाद १५.० (-१), बीड १९.४(३), परभणी १२.४ (-५), परभणी कृषी विद्यापीठ ११.०, नांदेड १६.० (-२), उस्मानाबाद १५.० (-२) अकोला १५.० (-३), अमरावती १३.७ (-४), बुलडाणा १६.० (-२), चंद्रपूर ११.६ (-६), गोंदिया १२.० (-६), नागपूर १३.६ (-३), वर्धा १४.६ (-३), यवतमाळ १२.५ (-५).