थंडीचा कडाका वाढला

उत्तरेकडील थंड वाऱ्याचे प्रवाह महाराष्ट्राच्या दिशेने येऊ लागल्याने राज्यात थंडीचा कडाका वाढू लागला आहे. मध्य महाराष्ट्र, मराठवाडा व विदर्भातील काही भागांत थंडीची लाट आली आहे.
थंडीचा कडाका वाढला
थंडीचा कडाका वाढला

पुणे ः  उत्तरेकडील थंड वाऱ्याचे प्रवाह महाराष्ट्राच्या दिशेने येऊ लागल्याने राज्यात थंडीचा कडाका वाढू लागला आहे. मध्य महाराष्ट्र, मराठवाडा व विदर्भातील काही भागांत थंडीची लाट आली आहे. सोमवारी (ता.२१) सकाळी आठ वाजेपर्यंत परभणी येथील वसंतराव नाईक मराठवाडा कृषी विद्यापीठाच्या आवारात राज्यातील यंदाच्या हंगामातील निचांकी ५.६ अंश सेल्सिअस तापमानाची नोंद झाली असल्याचे हवामान विभागाच्या सूत्रांनी सांगितले.     गेल्या पाच ते सहा दिवसांपासून हिमालय पर्वत आणि लगतच्या राज्यांमध्ये हिमवृष्टी होत असून, उत्तर भारतात थंडीची तीव्र लाट आली आहे. हरियानातील अंबाला येथे देशाच्या सपाट भूभागावरील सर्वांत कमी ३.३ अंश सेल्सिअस तापमानाची नोंद झाली होती. हरियाणा, चंडीगड, दिल्ली, उत्तर प्रदेश, उत्तर राजस्थानमध्ये तीव्र लाट होती. तर पश्चिम बंगाल, ओडिशा, बिहारसह विदर्भातही थंडीची लाट होती. बिहार, उत्तर प्रदेशात थंड दिवस अनुभवाला येत आहे. उत्तरेकडील थंडीच्या लाटेमुळे राज्यातील थंडीचा पारा वेगाने खाली आला आहे. यामुळे यवतमाळ, गोंदिया येथे ७ अंश सेल्सिअस, निफाड येथील गहू संशोधन केंद्रात ८.२ अंश सेल्सिअस तापमानाची नोंद हवामान विभागाकडे झाली आहे.  औरंगाबाद, अकोला, नागपूर, वर्धा, पुणे, नाशिक येथे तापमान १० अंशापेक्षा खाली घसरले. किमान तापमानात सरासरीच्या तुलनेत ८ अंशांची घट झाल्याने यवतमाळ येथे थंडीची तीव्र लाट, तर ४.५ अंशापेक्षा अधिक घट झाल्याने परभणी, गोंदिया येथे थंडीची लाट आली आहे. या थंडीमुळे दिवसभर पडणारे ऊन देखील ऊबदार वाटत आहे. सायंकाळनंतर पुन्हा थंडी वाढण्यास सुरूवात होत आहे. मध्यरात्रीनंतर थंडी वाढत जाऊन पहाटे चांगलीच कडाक्याची थंडी वाढत आहे. यामुळे मध्य महाराष्ट्र, मराठवाडा व विदर्भातील काही भागात किमान तापमानात सरासरीच्या तुलनेत आठ अंश सेल्सिअसपर्यंत  घट झाली आहे.

सोमवारी (ता.२१) सकाळपर्यंत विविध शहरांतील किमान तापमान, कंसात वाढ, घट झालेले तापमान (अंश सेल्सिअसमध्ये) ः मुंबई (सांताक्रुझ) १८.०, ठाणे २०.०, अलिबाग १७.१ (-१), रत्नागिरी १९.७, डहाणू १९.२ (१), पुणे ९.२ (-२), जळगाव १०.५ (-१), कोल्हापूर १५.७ (१), महाबळेश्वर ११.५ (-२), मालेगाव १०.८, नाशिक ९.१ (-१), निफाड ८.२, सांगली १४.६ (१), सातारा १२.१, सोलापूर १३.४(-२), औरंगाबाद ९.५ (-२), बीड १८.३ (५), परभणी ८.१ (-५), परभणी कृषी विद्यापीठ ५.६, नांदेड ११.० (-१), उस्मानाबाद १३.५, अकोला ९.६ (-४), अमरावती ११.१ (-४), बुलडाणा ११.४(-३), चंद्रपूर १०.० (-३), गोंदिया ७.० (-५), नागपूर ८.४ (-४), वर्धा ९.८ (-३), यवतमाळ ७.० (-८).

तीन दिवस थंडीची लाट राज्यातील कोरडे हवामान आणि उत्तरेकडील थंड हवा यामुळे नववर्षाच्या अखेरीस कडाक्याची थंडी वाढली आहे. येत्या दोन ते तीन दिवस थंडीची लाट कायम राहणार आहे. विदर्भात थंडीच्या लाटेचा प्रभाव अधिक राहणार असून किमान तापमानात घट होणार आहे, असा अंदाज हवामान विभागाच्या सूत्रांनी दिला.

डिसेंबर महिन्यातील नीचांकी तापमान (अंश सेल्सिअस)

वर्ष तापमान
२० डिसेंबर २०१० ६.५
२७ डिसेंबर २०११     ७.६
२७ डिसेंबर २०१२ ७.४
१४ डिसेंबर २०१३ ६.८
२९ डिसेंबर २०१४ ७.८
२६ डिसेंबर २०१५   ६.६
११ डिसेंबर २०१६ ८.३
 २९ डिसेंबर २०१७   ८.७
२९ डिसेंबर २०१८ ५.९
१९ डिसेंबर २०१९ १३.७
२१ डिसेंबर २०२० ७.०

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com