विदर्भाच्या काही भागांत थंडी

पुणे ः राज्यातील अनेक भागांत हवामान कोरडे झाले आहे. उत्तरेकडून थंड वाऱ्यांचे प्रवाह विदर्भाच्या दिशेने वाहण्यास सुरुवात झाली आहे. यामुळे विदर्भाच्या काही भागांत पुन्हा थंडी वाढण्यास सुरुवात झाली आहे. रविवारी (ता.२२) सकाळी आठ वाजेपर्यंत गोंदिया येथे ११.६ अंश सेल्सिअस सर्वांत कमी किमान तापमानाची नोंद झाली असल्याचे हवामान विभागाच्या सूत्रांनी सांगितले.   गेले आठ दिवस राज्यातील अनेक भागांत ढगाळ हवामानामुळे थंडी गायब झाल्याचे स्थिती होती. त्यातच अरबी समुद्रात असलेले कमी तीव्र दाबाचे क्षेत्र पश्चिम नैॡत्य भागाकडे सरकले असून त्याचे ‘गती’ या चक्रीवादळामध्ये रूपांतर झाले आहे. हे चक्रीवादळ येमेनमधील सोकोत्रापासून २१० किलोमीटर, सोमालियातील रास बिन्नाहपासून २९० किलोमीटर, तर आलूलापासून पश्चिम नैॡत्याकडे ३६० किलोमीटर अंतर होते. आज त्याची तीव्रता अधिक होणार आहे. त्याचा ताशी वेग १०० ते ११० किलोमीटर एवढा राहणार असून, त्याचा वेग १२० किलोमीटरपर्यंत वाढण्याची शक्यता आहे.   उत्तर भारतात असलेल्या थंडीच्या लाटेमुळे किमान तापमानात मोठी घट झाली आहे. पश्चिम राजस्थानमधील चुरू येथे देशातील ५.० अंश सेल्सिअसची किमान तापमानाची नोंद झाली आहे. त्याचा परिणाम राज्यातील वातावरणावर होत असून, थंड वारे राज्याच्या दिशेने वाहू लागले आहेत. त्यामुळे गेले काही दिवस कमी झालेली थंडी पुन्हा काही प्रमाणात वाढली असल्याने काही भागांत चांगलाच गारठा वाढला आहे. यामुळे किमान तापमानात घट झाली आहे.  कोकण, मध्य महाराष्ट्र व मराठवाड्यातील काही भागांत किमान तापमानात चढ-उतार झाले आहेत. विदर्भातील किमान तापमानात सरासरीच्या तुलनेत चार अंश सेल्सिअसपर्यंत घट होऊन किमान तापमानात मोठी घट झाली आहे. नागपूर, वर्धा, यवतमाळ, बुलडाणा येथील किमान तापमान सरासरीच्या जवळपास आहे. यामुळे या भागात पुन्हा थंडी वाढण्यास सुरुवात झाली आहे. रविवारी (ता.२२) सकाळपर्यंत विविध शहरांतील किमान तापमान, कंसात वाढ, घट झालेले तापमान. (अंश सेल्सिअस) ः मुंबई (सांताक्रूझ) २०.८ (१), अलिबाग २०.७ (१), ठाणे २३.८, रत्नागिरी २३.५ (२), डहाणू २१.४, पुणे १९.३ (५), जळगाव १९.० (५), कोल्हापूर २०.३ (३), महाबळेश्वर १६.४ (२), मालेगाव १५.८ (३), नाशिक १६.० (४), निफाड १५.०, सांगली २०.१ (४), सातारा २०.३ (५), सोलापूर २२.० (५), औरंगाबाद १७.० (४), परभणी १८.५ (४), परभणी कृषी विद्यापीठ १७.०, उ्स्मानाबाद २०.० (६), अकोला १६.५ (१), अमरावती १४.३ (-२), बुलडाणा १५.७, चंद्रपूर १७.० (२), गोंदिया ११.६ (-४), नागपूर १३.८, वर्धा १५.६, यवतमाळ १५.५.