उत्तर महाराष्ट्रात थंडीची चाहूल

पुणे : पावसाला पोषक हवामानामुळे राज्याच्या दक्षिण भागातील सोलापूर, सांगली, लातूर, उस्मानाबाद जिल्ह्यात हलक्या पावसाने हजेरी लावली आहे. तर उत्तरेकडून थंड वारे महाराष्ट्राकडे येऊ लागल्याने उत्तर महाराष्ट्र, मराठवाडा, विदर्भात रात्रीचे तापमान पुन्हा २० अंशांखाली घसरले अाहे. बुधवारी (ता. २४) नाशिक येथे राज्यातील नीचांकी १४ अंश सेल्सिअस तर नगर येथे १४.४ अंश सेल्सिअस तापमानाची नोंद झाल्याचे हवामान विभागातर्फे सांगण्यात आले. आज (ता. २५) कोकण, मध्य महाराष्ट्रात तुरळक ठिकाणी पावसाचा अंदाज वर्तविण्यात आला आहे.   बुधवारी सकाळपर्यंतच्या २४ तासांमध्ये सोलापूरमधील उत्तर सोलापूर, दक्षिण सोलापूर, सांगलीतील वीटा, इस्लामपूर, तासगाव कवठेमहांकाळ, कडेगाव, कोल्हापुरातील शिरोळ, लातूरमधील औसा, लातूर, उदगीर आणि उस्मानाबाद जिल्ह्यातील तुळजापूर, उस्मानाबाद, कळंब, उमरगा, लोहारा, वाशी तालुक्यांमध्ये तुरळक ठिकाणी हलक्या स्वरूपाच्या पावसाची नोंद झाल्याचे कृषी विभागातर्फे सांगण्यात आले. बुधवारी विदर्भ, तेलंगणा परिसरावर कमी दाबाचा पट्टा सक्रिय होता. आज (ता. २५) रायगड, रत्नागिरी, सिंधुदुर्ग, पुणे, सातारा, सांगली, सोलापूर, कोल्हापूर जिल्ह्यात हलका पाऊस पडण्याची शक्यता अाहे.  राज्यात कमाल तापमानातील वाढ कायम असून, बहुतांशी ठिकाणी तापमानाचा पारा ३४ ते ३७ अंशांच्या आसपास आहे. कोकणातील तापमानात मोठी वाढ झाली आहे. बुधवारी (ता. २४) सकाळपर्यंतच्या चोवीस तासांमध्ये सांताक्रूज येथे उच्चांकी ३७.६ अंश सेल्सिअस तापमान नोंदले गेले. तर दक्षिण मध्य महाराष्ट्र, कोकण वगळता जवळपास सर्वच ठिकाणी रात्रीच्या तापमानात घट होत असल्याचे दिसून आले. नगर, नाशिकसह जळगाव, अौरंगाबाद, उस्मानाबादमध्ये तापमान १६ अंशांच्या खाली उतरले आहे.   बुधवारी (ता. २४) सकाळपर्यंतच्या २४ तासांमध्ये राज्यातील विविध ठिकाणचे कमाल, किमान (कंसात) तापमान (अंश सेल्सिअसमध्ये) : पुणे ३४.८ (१६.५), नगर - (१४.४), जळगाव ३६.०(१६.०), कोल्हापूर ३३.२(२२.७), महाबळेश्‍वर २८.६(१६.९), मालेगाव ३५.८(१७.२), नाशिक ३४.६(१४.०), सांगली ३३.४(२०.७), सातारा ३४.२(१८.८), सोलापूर ३६.०(२१.३), सांताक्रूझ ३७.६(२०.२), अलिबाग ३३.९(२१.५), रत्नागिरी ३३.४(२३.४), डहाणू ३५.८(२२.४), आैरंगाबाद ३५.५(१५.२), परभणी ३६.०(१७.०), नांदेड ३५.०, उस्मानाबाद -(१५.४), अकोला ३६.६(१७.५), अमरावती ३७.२(१८.८), बुलडाणा ३५.० (१८.४), चंद्रपूर ३५.०(२१.०), गोंदिया ३४.०(१७.६), नागपूर ३४.८(१६.५), वर्धा ३५.९(१७.९), यवतमाळ ३७.० (१८.०).