राज्यात थंडी परतण्याची शक्यता 

पुणे : पावसाने उघडीप देताच राज्याच्या किमान तापमानात घट होऊ लागली आहे. उत्तरेकडील वारे महाराष्ट्राकडे येत असल्याने राज्यात थंडी परतण्याची शक्यता आहे. आज (ता.९) राज्यात हवामान मुख्यत: कोरडे राहण्याचा अंदाज हवामान विभागाने वर्तविला आहे. 

तीव्र कमी दाब क्षेत्रामुळे अरबी समुद्रात ढगांची दाटी झाली आहे. तर राज्याच्या अनेक भागात निरभ्र आकाश असून पावसाने उघडीप दिली आहे. अनेक ठिकाणी २० अंशापार गेलेले किमान तापमान पुन्हा १६ अंश किंवा त्यापेक्षा खाली घसरले आहे.   

राज्याचे किमान तापमान कमी होऊ लागल्याने, पहाटे गारठ्यात पुन्हा गारठा आला असून, काही भागात धुके पडत असल्याचे चित्र आहे. सोमवारी (ता. ८) महाबळेश्वर आणि औरंगाबाद येथे नीचांकी १४.४ अंश सेल्सिअस तापमानाची नोंद झाली. तर रत्नागिरी येथे उच्चांकी कमाल ३४.७ अंश सेल्सिअस तापमानाची नोंदले गेले.   

सोमवारी (ता. ८) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअसमध्ये) :  पुणे २९.७ (१५.८), नगर - (१७.६), जळगाव ३१.८(१५.१), कोल्हापूर ३०.५ (१९.८), महाबळेश्वर २३.६(१४.४), मालेगाव ३१.४ (१९.४), नाशिक २७.३ (१७.०), सांगली ३१.७(१८.९), सातारा ३१.०(१७.९), सोलापूर ३३.३ (१६.७), सांताक्रूझ ३२.८(२३.४), डहाणू ३२.९ (२४.३), रत्नागिरी ३४.७ (२३.९), औरंगाबाद २९.९ (१४.४), नांदेड ३३.० (१६.२), उस्मानाबाद - (१७.०), परभणी ३०.५ (१५.५), अकोला ३२.३ (१६.२), अमरावती ३१.४ (१५.७), ब्रह्मपुरी ३३.६ (१५.६), बुलडाणा ३०.० (१५.४), चंद्रपूर ३२.८ (१६.०), गडचिरोली ३२.४(१५.८), गोंदिया ३१.४ (१५.०), नागपूर ३१.२ (१४.१), वर्धा ३०.५(१४.५), वाशीम ३२.० (२०.०), यवतमाळ ३०.५ (१४.५). 

कमी दाब क्षेत्र किनाऱ्यापासून दूर सरकतेय  पूर्वमध्य अरबी समुद्रात तयार तीव्र कमी दाब क्षेत्र किनाऱ्यापासून दूर सरकू लागले आहे. ही प्रणाली मुंबईपासून ८४० किलोमीटर तर गोव्यापासून ८०० किलोमीटर नैर्ऋत्येकडे आहे. या कमी दाब क्षेत्राची तीव्रता कमी होत आहे. दरम्यान, अग्नेय बंगालच्या उपसागरात आज (ता.९) कमी दाबाचे क्षेत्र तयार होणार असून, पूर्व किनाऱ्याकडे येताना त्याची तीव्रता वाढण्याचे संकेत आहेत. गुरुवारपर्यंत (ता. ११) ही प्रणाली उत्तर तमिळनाडूच्या किनाऱ्यापर्यंत पोचण्याचे संकेत आहेत.