उत्तर भारतात थंडीची लाट; पंजाबमध्ये दहा वर्षांतील नीचांकी

नवी दिल्ली : सिमला आणि काश्‍मीरमधील हिमवृष्टीनंतर आता राजधानी दिल्लीत कडाक्याची थंडी पडत आहे. दिल्लीच्या जाफरपूरचे तापमान तापमान ६ अंश सेल्सिअसपेक्षाही कमी नोंदले गेले. अमृतसर शहरात थंडीने गेल्या दहा वर्षाचा विक्रम मोडला, येथे तापमान ०.४ अंश, तर जालंधरचे तापमान १.६ अंश सेल्सिअस राहिले. बिहारची राजधानी पाटण्यातही थंडी वाढली असून तेथे एका दिवसात तापमान ४ अंश सेल्सिअसपर्यंत पोचले.  राजस्थानात थंडीची लाट कायम आहे. बहुतांश शहरातील तापमान ३ अंश सेल्सिअसपर्यंत घसरले. बहुतांश ठिकाणी किमान तापमान १० अंश सेल्सिअसपेक्षा कमी राहिले. जोबनेर आणि माउंट अबू येथे तापमान उणे २.५ आणि चुरू येथे उणे ०.३ अंश सेल्सिअस नोंदले गेले.  मध्य प्रदेशात सहा शहरांतील तापमान ५-६ अंशांवर  राजधानी भोपाळसह मध्य प्रदेशात कडाक्याची थंडी पडत आहे.  भोपाळमध्ये हंगामातील सर्वांत नीचांकी ५ अंश सेल्सिअस तापमान नोंदले गेले. प्रदेशातील सहा शहरात ५ ते ६ अंशांच्या आसपास आणि २३ शहरांत १० अंश सेल्सिअस किंवा त्यापेक्षा कमी तापमान राहिले. राज्यात दतिया शहर हे सर्वांत थंड शहर म्हणून नोंदले गेले. तेथे दिवसा तापमान ३.१ अंश सेल्सिअस नोंदले गेले.  पाटण्यात दिवसभरात तापमान ४ अंशांवर  बिहारमध्ये बहुतांश शहरातील तापमान ३ ते ६ अंश सेल्सिअस नोंदण्यात आले. पाटण्यात कमाल आणि किमान तापमानात सरासरी ४ अंश सेल्सिअसची घसरण पाहवयास मिळाली.  नवी दिल्लीत तापमानात घसरण  राजधानी दिल्लीत थंडीने माणसाबरोबर प्राणी, पक्षी देखील गारठले आहेत. दिल्ली-एनसीआर येथे तापमानात सातत्याने घसरण होत आहे. काल नजफगडच्या जाफरपूर कला भागात तापमान २.७ अंश सेल्सिअस नोंदले गेले. एवढेच तापमान सिमल्यातही होते. पालम येथे ३.४, लोधी रोड येथे ३.८. सफदरजंग येथे ४.४ अंश सेल्सिअस तापमानाची नोंद झाली.  पंजाबमध्ये कडाका  पंजाबमध्ये थंडीची लाट आली असून अमृतसर येथील तापमानाने गेल्या दहा वर्षांतील विक्रम मोडला आहे. या ठिकाणी किमान तापमान ०.४ अंश सेल्सिअस राहिले. जालंधर-कपूरथला येथे १.६ अंश सेल्सिअस तापमानाची नोंद झाली. चंडीगड येथे देखील तापमानात घसरण होत आहे. तेथे ४.४ अंश सेल्सिअस तापमान नोंदले गेले.  रायपूरमध्ये २.५ अंश सेल्सिअस  उत्तर भारतातून थंड आणि पूर्व भागातून कोरडी हवा येत असल्याने छत्तीसगडमध्ये थंडी दाखल झाली आहे. रायपूर येथे काल रात्री तापमानात २.५ अंश सेल्सिअस घसरण झाली. अंबिकापूर येथे किमान तापमानाचा पारा ५ अंशाने घसरला आहे. तेथे ८.८ अंश तापमान राहिले.