'सांगोला', 'स्वामी समर्थ'च्या वसुलीसाठी उद्या जिल्हाधिकारी घेणार बैठक

संग्रहित छायाचित्र
संग्रहित छायाचित्र

सोलापूर : सांगोला तालुका सहकारी साखर कारखाना व स्वामी समर्थ सहकारी साखर कारखान्याकडे सोलापूर जिल्हा मध्यवर्ती सहकारी बॅंकेचे १६५ कोटी ७२ लाख रुपये थकीत आहेत. या कारखान्यांकडे इतर बॅंकांची कर्जे असल्याने जिल्हा बॅंकेला ही रक्कम वसूल करण्यासाठी अडचणी येत आहेत. या अडचणींवर तोडगा काढण्यासाठी जिल्हाधिकारी डॉ. राजेंद्र भोसले यांच्या उपस्थितीत गुरुवारी (ता. ४) बैठक होणार असल्याची माहिती जिल्हा बॅंकेचे अध्यक्ष राजन पाटील यांनी दिली.

या दोन्ही कारखान्यांना इतरही बॅंकांनी कर्ज दिले आहे. इतर बॅंकांची कर्जाची रक्कम कमी आहे. त्या तुलनेत जिल्हा बॅंकेच्या कर्जाची व व्याजाची रक्कम १६५ कोटींहून अधिक आहे. त्यामुळे या दोन्ही कारखान्यांच्या मालमत्तेचा ताबा जिल्हा बॅंकेला द्यावा, अशी मागणी बॅंकेच्या वतीने करण्यात आली आहे.

या दोन्ही बॅंकांना दिलेल्या सहभाग कर्जात वसुलीसाठी महाराष्ट्र राज्य सहकारी बॅंक ही अग्रणी बॅंक आहे. राज्य बॅंक वसुलीची प्रक्रिया राबवत नसल्याने जिल्हा बॅंकेला या कारखान्यांकडील कर्ज वसुलीसाठी मालमत्तेवर हक्क सांगण्यास अडचणी येत होत्या. हा प्रश्‍न सोडविण्यासाठी जिल्हा बॅंकेच्या वतीने राज्य बॅंकेकडे वारंवार पाठपुरावा केला जात होता.

राज्य बॅंकेच्या प्रशासक मंडळाचे सदस्य अविनाश महागावकर यांनी याबाबत जिल्हा बॅंकेत येऊन अध्यक्ष राजन पाटील व सरव्यवस्थापक किसन मोटे यांच्याशी चर्चा केली होती. सांगोला कारखान्याबाबत सर्वोच्च न्यायालयाने ताबा देण्याचे आदेश जिल्हाधिकाऱ्यांना दिले आहेत. स्वामी समर्थ कारखान्याबाबत जिल्हाधिकाऱ्यांकडे यापूर्वीच पत्रव्यवहार करण्यात आला आहे. पण अद्याप निर्णय झालेला नाही. पण आता उद्या (गुरुवारी) जिल्हाधिकारी कार्यालयात होणाऱ्या बैठकीला राज्य बॅंक व जिल्हा बॅंकेचे पदाधिकारी व अधिकारी उपस्थित असणार आहेत. त्यात अंतिम निर्णय होण्याची शक्‍यता आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com