नवी दिल्ली ः तमिळनाडूमध्ये लष्करी हेलिकाॅप्टरला बुधवारी (ता. ८) झालेल्या भीषण अपघातात चीफ आॅफ डिफेन्स स्टाफ जनरल बिपीन रावत यांच्यासह १३ जण मृत्यूमुखी पडले आहेत. मृतांमध्ये बिपीन रावत यांच्या पत्नी मधुलिका रावत यांचाही समावेश आहे. तर ग्रुप कॅप्टन विक्रम सिंह हे गंभीर जखमी असून, चेन्नईच्या लष्करी रुग्णालयात त्यांची मृत्यूशी झुंज सुरू आहे. दरम्यान, संरक्षण क्षेत्राला हादरविणाऱ्या या घटनेबाबत केंद्र सरकारतर्फे उद्या संसदेमध्ये निवेदन सादर केले जाणार आहे. तर हवाई दलाने अपघाताच्या चौकशीचे आदेश दिले आहेत.
लष्कर प्रमुख पदावरून निवृत्त झाल्यानंतर जनरल रावत यांची २०१९ मध्ये देशाच्या पहिल्यावहिल्या सरसेनाध्यक्षपदी नियुक्ती झाली होती. लष्कर, हवाईदल आणि नौदल या तिन्ही सेनादलांच्या एकत्रीकरणाच्या उद्देशाने या पदाची निर्मिती करण्यात आली होती. त्यानंतर त्यांच्याकडे डिपार्टमेन्ट आॅफ मिलिट्री अफेयर्स या विभागाचेही प्रमुखपद सोपविण्यात आले होते.
दिवंगत सरसेनाध्यक्ष रावत यांना राष्ट्रपती रामनाथ कोविंद, पंतप्रधान नरेंद्र मोदी, गृहमंत्री अमित शाह यांच्यासह केंद्रीय मंत्रिमंडळाच्या सुरक्षाविषयक समितीतर्फे श्रद्धांजली वाहण्यात आली. जनरल रावत यांच्या हेलिकाॅप्टरला अपघात झाल्याची माहिती समोर आल्यानंतर केंद्र सरकारच्या पातळीवर तातडीने उच्चस्तरीय सूत्रे हलली. संरक्षणमंत्री राजनाथसिंह स्वतः या अपघातग्रस्त हेलिकाॅप्टर आणि मदत कार्यावर लक्ष ठेवून होते. याबाबत पंतप्रधान नरेंद्र मोदींना कळविण्यात आले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.