लासलगांव बाजार समितीत शेतमाल तारण कर्ज योजना

नाशिक : निफाड तालुक्यात मका व सोयाबीन काढणीचे काम चालू झाले असून, हा शेतीमाल एकाचवेळी बाजार आवारात विक्रीस आल्यामुळे बाजारभाव कमी होऊन शेतकऱ्यांचे आर्थिक नुकसान होऊ नये म्हणून लासलगाव बाजार समितीने सन २०२१-२२ या हंगामाकरिता शेतीमाल तारण कर्ज योजना सुरू करण्याचा महत्त्वपूर्ण निर्णय घेतला असल्याची माहिती बाजार समितीच्या सभापती सुवर्णा जगताप यांनी दिली. 

महाराष्ट्र राज्य कृषी पणन मंडळ, पुणे या संस्थेमार्फत सन १९९०-९१ पासून राबविण्यात येणाऱ्या या योजनेअंतर्गत बाजार समिती सन २०२१-२२ या हंगामाकरिता मका, सोयाबीन, चणा व गहू या प्रमुख शेतीमालासाठी तारण कर्ज योजना राबविणार आहे. त्यानुसार या योजनेअंतर्गत फक्त उत्पादक शेतकऱ्यांचाच माल तारणात ठेवला जाणार आहे. शासकीय प्रतवारीकार व बाजार समितीचे प्रतवारीकार यांनी संयुक्तरीत्या शिफारस केलेला मका, सोयाबीन, चणा व गहू हा शेतीमाल ज्या दिवशी महाराष्ट्र राज्य वखार महामंडळाच्या गोदामात तारण म्हणून ठेवला जाईल.

त्या दिवसाचे बाजारभाव विचारात घेऊन बाजार समिती वखार महामंडळाचे पावतीप्रमाणे स्वनिधीतून संबंधित शेतकऱ्यास धनादेशाद्वारे रक्कम अदा करणार आहे. संबंधित शेतकऱ्यांचा खाते उतारा व सातबारा उताऱ्यावरील मका, सोयाबीन, चणा व गव्हाचे लागवड क्षेत्र व उत्पादित माल याचे प्रमाण ठरवून किमतीच्या ७५ टक्के रक्कम तारण कर्ज म्हणून ६ महिन्यांचे मुदतीने ६ टक्के व्याजदराने शेतकऱ्यांना अदा करण्यात येणार आहे. त्यानंतरच्या ६ महिन्यांकरिता ८ टक्के व त्यापुढील ६ महिन्यांकरिता १२ टक्के व्याजदराने आकारणी केली जाणार आहे. १८ महिन्यांनंतर या कर्जास मुदतवाढ मिळणार नसल्याचे सांगण्यात आले आहे. 

तरी कार्यक्षेत्रातील शेतकऱ्यांनी योजनेचा जास्तीत जास्त लाभ घ्यावा, असे आवाहन बाजार समितीच्या सभापती सुवर्णा जगताप यांनी केले आहे. योजनेच्या अधिक माहितीसाठी ९९२१४२३५३६ या भ्रमणध्वनी क्रमांकावर संपर्क साधावा.