कम्युनिष्ट पक्षाचे कामगारांच्या विविध मागण्यांसाठी आंदोलन

परभणी ः शेतकरी, स्थलांतरित मजुर महाबीज, वखार महामंडाळाची गोदामे, रेल्वे गुड्स शेड, तहसिल कार्यालयाची गोदामे आदी ठिकाणच्या कामगार, भारतीय कम्युनिष्ट पक्षातर्फे विविध मागण्यांसाठी शुक्रवारी (ता.२२) काळ्या फिती लावून निदर्शने करण्यात आली. 

केंद्र शासनाचे ४४ कामगार कायदे बदलण्याचे धोरण रद्द करा. कामाचे तास ८ वरून १२ तास करण्याचे आदेश रद्द करा. २० लाख कोटीचा दावा करणारी फसवी कोविड-१९ मदत योजना रद्द करा आणि कामगार शेतकरी, स्थलांतरित मजूर, छोटे व्यावसायिक, लघु-उद्योजक यांना थेट आर्थिक मदत द्या. शहरी भागात कोरोना तपासणीसाठी कार्यरत अंगणवाडी कर्मचारी, आशा कर्मचाऱ्यांना दोन हजार रुपये प्रोत्साहन भत्ता दया. लॉकडाऊन काळात पुरवठा साखळीसाठी कार्यरत असलेल्या रेल्वे गुड्स शेड, वखार महामंडळ, तहसील गोदामे येथील हमाल माथाडी कामगारांना १० रुपये प्रति टन प्रोत्साहनपर भत्ता द्या. परभणी मनपा सफाई कामगार सेलू पूर्णा, गंगाखेड येथील कामगारांचे थकीत वेतन अदा करा. 

रोजंदार कामगारांना मागील फरकासह किमान वेतन द्यावे. सर्व कंत्राटी सफाई कामगारांना किमान वेतन प्रोव्हिडंड फंड व अन्य कायदेशीर तरतुदीचा लाभ द्या, परभणी शहरात पूर्व भागात कायम स्वरूपी भाजी मार्केटसाठी जागेची सुविधा उपलब्ध करावी. फेरीवाला कायद्याची अंमलबजावणी करुन थेट १० हजार रुपयाची आर्थिक मदत द्यावी. महाबीज प्रक्रिया केंद्रातील सर्व कामगारांना लॉकडाऊन काळातील मार्च एप्रिल, मे महिन्यातील वेतन द्या, आदी मागण्यांसाठी भारतीय कम्युनिस्ट पक्षाचे जिल्हा सरचिटणी कॉ. राजन क्षीरसागर, अॅ़ड. माधुरी क्षीरसागर, शेख अब्दुल, शेख मुनीर सय्यद अजगर, भगवान कनकुटे, किरण गायकवाड, शेख सलीम आदीसह कामगारांनी विविध ठिकाणी काळ्या फिती लावून निदर्शने केली.