आंदोलनातील मृत शेतकऱ्यांच्या कुटुंबीयांना भरपाई द्या ः राहुल गांधी

नवी दिल्ली : कृषी कायदे रद्द झाल्यानंतर आता मोदी सरकारला घेरण्यासाठी कॉंग्रेस नेते राहुल गांधींनी आता शेतकरी आंदोलनात मृत्यूमुखी पडलेल्या शेतकऱ्यांच्या कुटुंबीयांना सरकारने भरपाई द्यावी, अशी मागणी केली आहे. सरकारने चूक मान्य केली असल्याने आता ही भरपाई द्यावी अशी मागणी राहुल गांधी यांनी आज केली. सरकार घाबरल्याचा टोलाही त्यांनी लगावला. 

कृषी कायदे रद्द करण्याची पंतप्रधानांची घोषणा आणि त्यानंतरचे राजकीय आरोप प्रत्यारोप या सर्व काळात परदेश दौऱ्यावर असलेले राहुल गांधी आज संसदेच्या दोन्ही सभागृहांमध्ये कृषी कायदे मागे घेण्याच्या विधेयक चर्चेविना आवाजी मतदानाने संमत झाल्यानंतर पहिल्यांदा मध्यमांसमोर आले आणि पंतप्रधान नरेंद्र मोदींना लक्ष्य केले. ते म्हणाले, की कृषी विधेयक रद्द करण्यासाठीच्या भाषणात पंतप्रधान नरेंद्र मोदींनी चूक झाल्याचे मान्य केले होते. आता सरकारने चूक मान्य केली असताना आंदोलनामध्ये मृत्यूमुखी पडलेल्या शेतकऱ्यांच्या कुटुंबियांना भरपाई मिळायला हवी. शेतकरी आंदोलनामध्ये सातशेहून शेतकऱ्यांचा बळी गेल्यावरून कॉंग्रेसतर्फे सरकारला लक्ष्य केले जात आहे. 

राहुल गांधी म्हणाले,की तीन काळे कृषी कायदे सरकारला मागे घ्यावेच लागतील, असे आपण म्हटले होते. देशातील तीन चार भांडवलदारांपुढे शेतकऱ्यांची ताकद कमी पडू शकत नाही. हे शेतकरी, मजुरांचे यश आहे. मात्र कायदे रद्द करण्यात आले आणि संसदेत त्यावर चर्चा होऊ दिली नाही, ते पाहता सरकार घाबरले आहे हे दिसून येते. आपण चूक केली असल्याचे सरकारला कळले आहे, हे त्यातून कळते. आंदोलनात हुतात्मा झालेल्या लोकांबद्दल, शेतकऱ्यांच्या विरोधात कायदे बनविण्यामागे कोणती शक्ती होती, याबद्दल चर्चा करायची आहे.