आटपाडीतील कालव्याचे अस्तरीकरण पूर्ण

खरसुंडी, जि. सांगली : आटपाडी तालुक्यातील ३२ किलोमीटरमधील टेंभू योजनेच्या मुख्य कालवा अस्तरीकरणाचे काम गेल्या दीड वर्षापासून सुरू होते. ते पूर्ण झाल्याने पाण्याची गळती थांबली आहे. अजूनही कालव्यांचे अस्तरीकरण अनेक ठिकाणी राहिल्याचीही स्थिती आहे. 

दुष्काळी भागासाठी असणारी टेंभू योजना सातारा सांगली आणि सोलापूर जिल्ह्यासाठी आहे. सांगली जिल्ह्यात कडेगाव, खानापूर, आटपाडी सांगोला व कवठेमंकाळ असा प्रवास सुरू आहे. मुख्य कालवा चार तालुक्यांतून जातो. आटपाडी तालुक्यात तो ३२ किमी आहे. त्याचे अस्तरीकरण पूर्ण झाले आहे. तालुक्यातील कालव्यास पाणी सोडण्यासाठी १६ प्रवेशद्वार बसवण्यात आली आहेत. त्याचबरोबर सध्या बंदिस्त पाइपद्वारे काम सुरू आहे. या ठिकाणीही प्रवेशद्वारीची सुविधा ठेवली जाणार आहे.

वर्षातून तीन वेळा शेतकऱ्यांच्या मागणीनुसार योजनेस पाणी सोडण्यात येते. त्यानंतर शेतकऱ्यांकडून पैसे भरून जलसंपदा विभाग पाणी वितरण करते. अजून तालुक्यातील सर्वच भागांत पाणी पोचले नाही. समन्यायी समान पाणीवाटप या नियमानुसार बंदिस्त पाइपद्वारे तालुक्यातील सर्व गावात ही योजना पूर्णत्वास जाईल. त्या वेळी सर्व तालुक्यांतील शेतकऱ्यांना हक्काचे पाणी मिळू शकेल. मात्र, हे काम होण्यास अजून एक वर्षाचा कालावधी लागेल, अशी शक्यता आहे.

सध्या तालुक्यात दोन ठिकाणी बंदिस्त पाइपचे काम सुरू आहे. कामास गती नसल्यामुळे वेळ लागत आहे. टेंभू योजनेचे सर्व पंप सुरू नसल्याने पाणी कमी प्रमाणात येत आहे. सर्व पंप सुरू झाल्यास पूर्ण क्षमतेने पाणी तालुक्यात येईल. त्या वेळी तालुक्यातील सर्व तलाव बंधारे भरण्यासाठी पाणी सोडले जाणार आहे. तालुक्यातील साठवण तलावात मोठा पाऊस नसल्याने पाणी आले नाही. आता हे तलाव टेंभू योजनेच्या पाण्याने भरले जाणार आहेत.