`म्हैसाळ’ची कामे १५ ऑगस्टपूर्वी पूर्ण करा`

सोलापूर  : म्हैसाळ योजनेतून सांगोला, मंगळवेढा, जत या तिन्ही तालुक्‍यांतील ३२ हजार ५०० हेक्‍टर लाभक्षेत्राला पूर्ण क्षमतेने टेलपर्यंत पाणी मिळावे, यासाठी या योजनेची सर्व अपूर्ण कामे १५ ऑगस्टपूर्वी पूर्ण करावीत, अशी मागणी आमदार शहाजी पाटील, आमदार भारत भालके, आमदार विक्रमसिंह सावंत व माजी आमदार दीपक साळुंखे-पाटील यांनी केली. 

म्हैसाळ योजना प्रकल्प अधिकाऱ्यांच्या शुक्रवारी (ता. २) सांगोला येथे झालेल्या बैठकीत ही मागणी करण्यात आली. या वेळी म्हैसाळ योजना कार्यकारी अभियंता विजय पाटील, टेंभू योजना कार्यकारी अभियंता सचिन पवार, उपविभागीय अभिकारी सी. ए. मिरजकर, सहायक अभियंता मनोज कर्नाळे, अश्‍विन कर्नाळे, सुभाष देवकाते, दिलीप मोटे, संजय देशमुख, चंद्रकांत कारंडे आदी उपस्थित होते. 

आमदार पाटील म्हणाले, ‘‘म्हैसाळ योजनेचे पाणी प्रतापपूर तलाव व कुंभरी (जत) मार्गे कोरडा नदीत सोडून लहान मोठे तलाव व सर्व बंधारे भरून द्यावे. हे करत असताना मंगळवेढा तालुक्‍यातील शेतकऱ्यांवर अन्याय होणार नाही याची काळजी घ्यावी. त्यासाठी म्हैसाळ प्रकल्प सांगोला व मंगळवेढा वितरिका १ व २ वरील सर्व कामे पूर्ण करून घ्यावीत.’’ 

आमदार भालके म्हणाले की, ‘म्हैसाळ'चे पाणी कोरडा नदीमध्ये सोडत असताना अपुऱ्या कामांची तात्काळ पूर्तता करावी. आवर्तन सुरू झाल्यानंतर ‘टेल टू हेड' या नियमाप्रमाणे मंगळवेढा तालुक्‍याच्या लाभक्षेत्रातील टेलपर्यंत पाणीदेखील पोचेल, याची दक्षता अधिकाऱ्यांनी घ्यावी. 

पाण्याचा विसर्ग वाढवून या योजनेचे पाणी जत, सांगोला व मंगळवेढा या तिन्ही तालुक्‍यांना मिळण्यासाठी उर्वरित कामे लवकरात लवकर पूर्ण करावीत, अशा सूचना आमदार सावंत यांनी केल्या.  पहिल्यांदाच मिळणार पूर्ण क्षमतेने पाणी  

म्हैसाळ योजनेच्या मिळणाऱ्या आवर्तनातून मंगळवेढा, जत व सांगोला तालुक्‍यांतील ३२ हजार ५०० हेक्‍टर क्षेत्र ओलिताखाली येणार आहे. म्हैसाळ प्रकल्पअंतर्गत मंगळवेढा वितरिका १ व २, सांगोला वितरिका क्रमांक एक व दोन व त्यावरील सर्व बंदिस्त नलिकांची कामे येत्या १५ ऑगस्टपर्यंत पूर्ण करून कोरडा नदीवरील मोठे तलाव, कोल्हापुरी बंधारे भरून देण्यासाठी जत, सांगोला व मंगळवेढा तालुक्‍याचे आमदार व अधिकारी यांचे एकमत झाले. त्यामुळे कोरडा नदीमध्ये या वर्षी पहिल्यांदाच पूर्ण क्षमतेने आवर्तन मिळणार आहे.