उडीद पीक काढणीप्रसंगी पावसाने वाढवली चिंता

पाथरुड, जि. उस्मानाबाद : पूर्वा नक्षत्राच्या शेवटच्या दोन दिवसामध्ये पाथरूडसह परिसरात शुक्रवारी (ता. ११) रात्री सातच्या सुमारास एक तास मेघगर्जनेसह जोरदार पाऊस झाला. सलग तीन दिवस पाऊस होत असल्याने हातातोंडाशी आलेले खरीप हंगामातील काढणीस आलेल्या उडीद पिकाचे नुकसान होऊन शेतकऱ्यांचे आर्थिक नुकसान होत आहे. तसेच उडिदाचे पीक वाचवण्यासाठी शेतकऱ्याची तारांबळ दिसून येत आहे.

पूर्वा नक्षत्राच्या सुरुवातीपासून आठ ते दहा दिवस पावसाने उघडीप दिल्याने खरिपातील  उडीद पिकाची काढणी व मळणीची कामे शेतशिवारात जोमाने चालू होती. परंतु, बुधवार (ता. ९) पासून सलग तीन दिवस संध्याकाळी पाऊस पडत असल्याने शेतशिवारात पावसाचे पाणी साचले असल्याने उडीद मळणीची कामे खोळंबली आहेत.

उडीद मळणीसाठी मळणीयंत्र मिळत नसल्याने काढलेले उडिदाचे पीक शेताच्या बाहेर काढणे व प्लास्टिकच्या कागदाने झाकून ठेवण्यासाठी शेतकऱ्यांची धावपळ होऊ लागली आहे. तीन दिवसांपासून होत असलेल्या पावसामुळे खरीप हंगामातील सुकू लागलेल्या सोयाबीन, तूर, कापूस पिकांसह रब्बी हंगामातील पिकांनाही फायदा होणार असल्याने शेतकऱ्यांतून समाधान व्यक्त होत आहे. परंतु, पूर्वा नक्षत्राच्या शेवटी बुधवार ते शुक्रवार असे तीन सलग  दिवस पाऊस झाला आहे.

 पाथरूड परिसरातील पाटसांगवी, राळेसांगवी, हिवर्डा, जयवंतनगर, बेदरवाडी येथील  खरीप हंगामातील सोयाबीन, तूर, कापूस मका, सूर्यफूल सर्वच पिकांना चांगली फायदा झाला आहे. गेल्या पंधरा दिवसांपासून शेतकऱ्यांनी खरीप हंगामातील उडीद पिकांची काढणीची कामे जोरात चालू असल्याने काढलेली उडीद शेतातच पावसात भिजत असल्याने शेतकऱ्यांचे आर्थिक नुकसान होत आहे.

पाथरुड, बागलवाडी, वडाचीवाडी, उमाचीवाडी, दुधोडी, सावरगांव, बेदरवाडी, पाटसांगवी, राळेसांगवी, जयवंतनगर परिसरात मोठा एक तास पाऊस झाला आहे. परंतु उडीद मळणीसाठी मळणी यंत्र मिळत नसल्याने शेतकरी काढलेले उडीदाचे पीक गोळा करुन झाकण्यासाठी शेतकऱ्याची तारांबळ होत आहे.