`अमरावती जिल्ह्यात पीक नुकसानीचे पंचनामे करा`

अमरावती :  जिल्ह्यात संततधार पावसामुळे पिकांचे मोठे नुकसान झाले आहे. या पिकाचे तातडीने पंचनामे करण्याचे निर्देश जिल्हा परिषदेच्या जलव्यवस्थापन समितीच्या सभेत देण्यात आले. 

कोरोणाच्या पार्श्वभूमीवर जिल्हा परिषदेच्या जलव्यवस्थापन समितीची सभा व्हिडिओ कॉन्फरन्सद्वारे पार पडली. यावेळी अध्यक्ष बबलू देशमुख, सभापती दयाराम काळे, प्रियंका दगडकर, पूजा आमले, पार्वती काठोळे, वासंती मंगरोळे,  सुशीला कुकडे, अतिरिक्त मुख्य कार्यकारी अधिकारी विनय ठमके, सिंचन विभागाचे कार्यकारी अभियंता शारीष तट्टे,  पाणीपुरवठा विभागाचे राजेंद्र सावळकर, चंद्रशेखर खंडारे, श्रीराम कुलकर्णी, कृषी विभागाचे अनिल खर्चान उपस्थित होते. 

सततच्या पावसामुळे काही ठिकाणी कपाशीवर रोगाचा प्रादुर्भाव झाला. त्यामुळे या पीक नुकसानीचे पंचनामे तातडीने करण्याचे निर्देश अध्यक्षांनी कृषी अधिकाऱ्यांना दिले. जिल्हाभरात ‘मागेल त्याला शेततळे’ याबाबत विस्तृत अहवाल सादर करण्याच्या सूचनाही त्यांनी दिल्या.  

अमरावती तालुक्यातील सात, अचलपूर तालुक्यातील १८ गावांना पाण्यासाठी विहीर अधिग्रहणाद्वारे पाणीपुरवठा केला जात असल्याची माहिती अधिकाऱ्यांनी सभागृहात दिली. सिंचन विभागामार्फत करण्यात येत असलेल्या कामांचा विस्तृत आढावा घेण्यात आला. पथ्रोट येथे पाणीपुरवठा संदर्भात महाराष्ट्र जीवन प्राधिकरणाकडून मुद्दा मांडण्यात आला.